«Հայաստանում ստեղծվել է մի իրավիճակ, որ մենք կկարողանանք կրկնել Չիլիի օրինակը»,- նոյեմբերի 20-ին Ազատության հրապարակում «Չեք անցկացնի» նախաձեռնության կազմակերպած հանրահավաքի ընթացքում հայտարարեց Լեւոն Զուրաբյանը:
Նա նշեց, որ եթե ժողովրդի կամքը ներկայացված կլինի ընտրատեղամասերում, դա թույլ կտա հանձնաժողովականներին եռակի, քառակի անգամ շատ պայքարել. «Սա շատ կարեւոր է, որ կարողանանք հաղթահարել տեղամասային արձանագրությունների կեղծումը»:
Լեւոն Զուրաբյանը հայտարարեց, որ հանրաքվեին բարձր մասնակցությունը կձախողի նաեւ ռեժիմի բազմաքվեարկության փորձերը, իսկ ժողովրդի բարձր տրամադրությունը էապես կնվազեցնի ընտրակաշառքի բաժանումը:
«Ակնհայտ է, որ ստեղծվել է աննախադեպ մի վիճակ, որում ժողովրդի մասնակցությունը եւ քվեարկությունը Սերժ Սարգսյանին կդնի այն վիճակում, ինչպիսի իրավիճակում Չիլիի բնակչությունը դրեց Պինոչետին: Իսկ ինչ կանենք, որ Սերժ Սարգսյանը, եթե սխալ որոշում ընդունի մենք դրա մասին կխոսենք դեկտեմբերի 7-ի հանրահավաքին»,- հայտարարեց նա
Կարդացեք նաև
Նա հավելեց, որ մինչեւ այդ՝ դեկտեմբերի 3-ին պետք է ուժի ցուցադրություն անել. «Մենք իրավունք չունենք այս հաղթանակած պարտիան չհասցնել ավարտին, դրա համար մի կողմ պետք է դնել հիասթափությունը եւ հուսահատությունը եւ ջախջախենք Սարգսյանին ընտրատեղամասերում, այնուհետեւ նաեւ հրապարակներում»:
Հանրահավաքի ավարտից հետո «Չեք անցկացնի» քաղաքացիական նախաձեռնությունը երթ սկսեց:
Ամի ՉԻՉԱԿՅԱՆ
