«Արամ Խաչատրյան» համերգասրահում այսօր տեղի ունեցավ մեծանուն կոմպոզիտորի անվան 3-րդ միջազգային փառատոնի փակման համերգը, որի ընթացքում Հայաստանի պետական երիտասարդական նվագախումբը ներկայացրեց «Խաչատրյանը և ջազը» բացառիկ նախագիծը։ ՀՊԵՆ-ը եւ Հայաստանի պետական ջազ նվագախումբն առաջին անգամ ջազային գործիքավորմամբ կատարեցին Արամ Խաչատրյանի ստեղծագործություններից։ Մշակումների հեղինակները հայ կոմպոզիտորներ են, ովքեր աշխատել են հնարավորինս «չշեղվել» բուն ստեղծագործություններից:
«Շատ ջազմեններ են տրվում այդ գայթակղությանը, բայց դրանից դասական երաժշտությունը չի տուժում, որովհետեւ այդ գործերը լուրջ մեկնաբանություններ են: Խեղելու եւ խեղաթյուրելու նպատակ չկա, պարզապես այդ հանճարեղ ստեղծագործությունները դիտել ենք ջազմենների տեսանկյունից եւ ոճից»,-լրագրողների հետ զրույցում ասաց Հայաստանի պետական ջազ նվագախմբի գեղարվեստական ղեկավար, դիրիժոր Արմեն Հյուսնունցը:
Նրա դիտարկմամբ՝ Արամ Խաչատրյանի երաժշտության ջազային մեկնաբանությունը միշտ արդարացված է. «Պարզ է, որ շատ բան կախված է կատարողից եւ գործիքավորողից: Այսօր մեր ներկայացրած 11 ստեղծագործություններում ներգրավված էին երիտասարդ եւ տարեց կոմպոզիտորների գործիքավորումներ: Այդ բազմազանությունն էլ նախագիծը հետաքրքիր է դարձնում»:
Կարդացեք նաև
Հիշեցնենք, որ հոկտեմբերի 3-ից դեկտեմբերի 5-ը Երևանում անցկացվեց Խաչատրյանի անվան 3-րդ միջազգային փառատոնը, որն արդեն մեծ ճանաչում ունի արտերկրում: «Խաչատրյանի երաժշտությունը բացառիկ ազգային է: Խաչատրյանը հերոս է, որի երաժշտության ինքնատիպության համար նրան համարում ենք մեծ հայ եւ համամարդկային արժեք: Հպարտ եմ, որ երիտասարդական նվագախումբը կյանքի կոչեց նրա անվան փառատոնը: Պարզապես չէիք կարող չունենալ Խաչատրյանի անվան փառատոն»,-նշեց Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:
Նա մեջբերեց մեծանուն կոմպոզիտորի խոսքերից՝ «Ջազն այն երաժշտությունն է, որն ինձ ուրախություն է պարգեւում»: Սմբատյանի բնորոշմամբ՝ «Խաչատրյանը եւ ջազը» նախագիծը պետք է շարունակական լինի եւ ներկայացվի նաեւ արտերկրում:
Հավելենք, որ այսօրվա համերգը նվիրված էր դաշնակահար Լևոն Մալխասյանի 70-ամյակին։ Երեկոյի ընթացքում դաշնակահարը եւս հանդես եկավ կատարումներով: Հնչեցին նաեւ հատվածներ Խաչատրյանի «Սպարտակ» և «Գայանե» բալետներից:
Լուիզա ՍՈՒՔԻԱՍՅԱՆ
