Ինչպես արդեն տեղեկացրել ենք Սահմանադրական դատարանը (ՍԴ) մերժեց ՀԱԿ խմբակցության և 19 պատգամավորների, ինչպես նաև ՀԿ-ների կողմից դիտորդական առաքելություն իրականացրած մի խումբ դիտորդների, ԶԼՄ-ների ու մի խումբ քաղաքացիների կողմից ՍԴ-ին հասցեագրված դիմումները`դեկտեմբերի 6-ի սահմանադրական փոփոխությունների հանրաքվեն անվավեր ճանաչելու մասին:
«Իրավունքի Եվրոպա միավորում» հասարակական կազմակերպության անդամ, փաստաբան Տիգրան Եգորյանը պարզաբանեց, որ ՍԴ աշխատակազմի ղեկավար Առուշան Հակոբյանն իրավունք չուներ ոտքի վրա մերժել դիմումների ընդունումը: Այս առիթով փաստաբանը մանրամասնեց. «Ես բոլոր դիմումները ներկայացրի, բայց Առուշան Հակոբյանը հայտարարեց, որ չի ընդունում: Այնինչ բոլոր հարցերը քննարկվում են դիմումն ընդունելուց հետո որոշակի ժամանակահատվածում: Ոտքի վրա առանց դիմումն ընդունելու, դրա հիմնավոր ուսումնասիրության չի կարող կայացվել նման որոշում. դա իրավունքի հետ կապ չունի»:
Կարդացեք նաև
Պարոն Հակոբյանը պնդում էր, թե չի կարող դիմումն ընդունել, քանի որ Տիգրան Եգորյանը սուբյեկտ չէ և նաև դիմումում առկա չէ պատգամավորների 1/5-ի ստորագրությունը: Այս առիթով Տիգրան Եգորյանը պարզաբանեց. «Առուշան Հակոբյանը չի կարող տեղյակ լինել, թե ես կոնկրետ քանի պատգամավորի ստորագրություն եմ բերել և չի կարող ինքնուրույն որոշումներ կայացնել, որ դիմումն ընդունել, որը ոչ՝ ելնելով իր ընկալած ու չընկալած, կարդացած օրենքներից: Դա իր լիազորությունների ներքո գտնվող հարց չէ»:
Տիգրան Եգորյանն արձանագրեց, որ ժամը 17.42-ից ՍԴ ընդունարանը փակ է եղել, իրենց հայտնել են, որ ընդհանուր բաժնի ղեկավարն իրենց կընդունի,սակայն քննարկումներից հետո գործուղել են Առուշան Հակոբյանին. «Նա ինչ-որ հայտարարություններով ժամանակ էր ձգում: Ուղիղ մինչև 18.01-ը Առուշան Հակոբյանը հայտարարություններ էր անում, հետո հայտարարեց, որ ժամանակն ավարտվել է: Մինչը դա տասնհինգ րոպե պնդում էր, որ այսօր աշխատանքային օրն ավարտվել է 17.45:
Նույնը արեց ԿԸՀ-ում Նունե Հովհաննիսյանը՝ հանձնաժողովի անդամը, որը պաշտոնական պարզաբանում էր տվել ՄԻՊ-ին, որ աշխատակազմը չի աշխատում, քանի որ կիրակի է, սակայն ժամը տասի սահմաններում նոր իրավաբանական վարչության պետը ընդունեց մեր բոլոր դիմումները: Ցավոք, ՍԴ-ն այն միակ ատյանն է, որը իրավասու է հանրության ամենակարևոր խնդիրների վերաբերյալ լուծում տալ»:
Պարոն Եգորյանն ամփոփեց.«Հայտարարում են, թե ընդունարանի աշխատակիցները տեղում են, բայց դռներն են փակ: Այսօր արձանագրվեց, որ ՀՀ հետագա կյանքի համար մի անգերագնահատելի հարցի կապակցությամբ դիմում ընդունելու համար այն միակ ատյանի, որը իրավասու է այդ հարցին անդրադառնալ, դռները փակ էին»:
Տաթև ՀԱՐՈՒԹՅՈՒՆՅԱՆ
