Տարածաշրջանային հարցերով փորձագետ–վերլուծաբան Սարգիս Հացպանյանի գնահատմամբ, հայոց ցեղասպանության 100-րդ տարելիցը Թուրքիայի համար իսկական գլխացավանք էր:
Այսօր «Նոյան տապան» ակումբում պարոն Հացպանյանն ասաց, որ Հայաստանը չկարողացավ օգտվել հնարավորությունից աշխարհին ներկայացնելու մեր պահանջները:
«Մինչեւ հիմա աշխարհին չենք կարողանում ասել, թե ինչ ենք ուզում: Ցեղասպանությունից հարյուր տարի անց չենք կարողանում ձեւակերպել մեր ասելիքը»,- ասաց Սարգիս Հացպանյանը:
Նրա բնորոշմամբ, թուրքերը այս տարի տարելիցին ընդառաջ վախեցած սպասում էին , թե հայերն ինչ կանեն, բայց հայերը ոչինչ չարեցին. «Անգլիայի վերլուծաբաններից մեկի հարցազրույցն էի դիտում, վերլուծաբանը զարմացած էր, ասում էր՝ թե ինչ ակտիվ անելիքներ էին սպասում հայերից, բայց ակնկալիքները չարդարացան: Ասում է՝ դուք ձեր համայնքներում ժողովներ եք անում ու սահմանափակվում: Հայկական հարցը չքաղաքականացվեց, Թուրքիան այնպես շունչ քաշեց: Դա մեր թերացումն է»:
Կարդացեք նաև
Նրա խոսքով, Թուրքիայի համար այս տարին նշանավորեց նաեւ երկու խորհրդարանական ընտրություններով, որն իրավիճակ փոխեց ներքաղաքական դաշտում, բայց թուրքական իշխանությունը շարունակում է նույն քաղաքականությունը, որը հարյուր տարի առաջ երիտթուրքերն էին անում:
Անդրադառնալով Թուրքիայի արտաքին քաղաքականությանը՝ պարոն Հացպանյանն ասաց, որ Թուրքիան ՌԴ քայլերից հետո իրեն մենակ զգաց ու քաղաքական գիծը փոխեց, հիմա ԱՄՆ-Թուրքիա- Իսրայել համագործակցությունը վերականգնման փուլում է ընդդեմ ՌԴ- ՀՀ -Իրան եւ Սիրիա առանցքին. «Սա վերականգնում է այն, ինչ եղել է ժամանակին: Մենք՝ հայերս, այս հինգ տարվա մեջ ունենալով համայնք Իրանում, Սիրիայում, Ռուսաստանում ոչ մի դերակատարություն չունեցանք այդ երկրների տնտեսական, քաղաքական եւ այլ ոլորտներում: Մենք կանք, բայց, կարծես թե, չկանք ոչ մի տեղ»:
Արփինե ՍԻՄՈՆՅԱՆ
