Այսօր ԱԺ էթիկայի ժամանակավոր հանձնաժողովում քննարկվեց լրագրող Լիլիթ Լալայանի դիմումը՝ ՀՀԿ եւ ԲՀԿ 7 պատգամավորների հարցով, որոնք ԱԺ արտահերթ նստաշրջանում քվեարկել էին ուրիշի փոխարեն: Դիմումին կից լրագրողը ներկայացրել էր նաեւ տեսանյութեր ու հրապարակումներ:
Նա խնդրել է քննել Սպարտակ Մելիքյանի, Համլետ Հարությունյանի, Բազմասեր Առաքելյանի, Կարեն Սարիբեկյանի, Սեյրան Սարոյանի, Առաքել Մովսիսյանի եւ Արշակ Մխիթարյանի կողմից ԱԺ կանոնակարգ-օրենքի 6.1 հոդվածով նախատեսված էթիկայի կանոնները խախտելու հարցը եւ կայացնել համապատասխան որոշում:
Էթիկայի հանձնաժողովի նիստում միաձայն որոշում է կայացվել դիմումին ընթացք տալ, եւ զեկուցող է նշանակվել Թեւան Պողոսյանը:
Կարդացեք նաև
Լրագրողների հետ զրույցում հանձնաժողովի նախագահ Վահան Բաբայանն ասաց, որ արդեն իսկ բոլոր փաստերը ներկայացված էին եւ հանձնաժողովը որեւէ հիմք չուներ մերժելու այն. «Կանոնակարգ օրենքում գրված է, որ պատգամավորը քվեարկում է ինքնուրույն: Քանի որ կա փաստ, որ պատգամավորները քվեարկել են ոչ իրենց փոխարեն, ավտոմատ ընդունվում է վարույթ»:
Թե ինչ է սպասվում կարգազանց պատգամավորներին՝ Վահան Բաբայանն ասաց, որ այս տարի անպայման պետք է ԱԺ կանոնակարգ օրենքում փոփոխությունների գնան, որպեսզի ԱԺ էթիկայի հանձնաժողովի որոշումներով նաեւ կարողանան պատասխանատվության ենթարկել պատգամավորներին. «Դա ավելի կզգոնացնի, կկարգավորի ոլորտը: Ցավալի է, որ պատգամավորները կարող են ասել՝ դե, էթիկայի հանձնաժողովն արձանագրեց, ի՞նչ դրանից: Իրենք ճիշտ են, բացի արձանագրելուց, էթիկայի հանձնաժողովը այլ լիազորություն չունի»:
Հարցին՝ դիմումում նաեւ ԲՀԿ պատգամավորների խախտման մասին խոսք կա, դա Ձեզ չի՞ կաշկանդում, որպես հանձնաժողովի անդամ, օբյեկտիվ որոշում կայացնել՝ Վահան Բաբայանը պատասխանեց. «Անձամբ ինձ համար որեւէ տարբերություն չկա: Բոլորն էլ իմ ընկերներն են, գործընկերներն են, բայց կա փաստ: Եթե զբաղվում ենք այս գործունեությամբ, եթե կան խախտումներ, մեզ դիմում են, որեւէ անձնական, սիմպատիայի, անտիպատիայի հարց չկա»:
Փետրվարի 1-ին հանձնաժողովում կքննարկվի ինչպես այս հարցը, այնպես էլ ՀՀԿ պատգամավոր Շուշան Պետրոսյանի հետ կապված դիմումը:
Հռիփսիմե ՋԵԲԵՋՅԱՆ
