«Ընթանում են քննարկումներ, բայց վերջնական լուծումներ դեռ չկան, միայն առաջիկա քննարկումները կասեն, թե համագործակցության ինչպիսի մոդել կլինի»,-անդրադառնալով ՀՅԴ-ՀՀԿ կոալիցիա կազմելուն ասաց ՀՀԿ անդամ, ԱԺ Ֆինանսավարկային եւ բյուջետային հարցերի մշտական հանձնաժողովի նախագահ Գագիկ Մինասյանը:
Պարոն Մինասյանը լրագրողներին հանդիպեց ՀՀԿ գրասենյակում՝ մի քանի ժամ տեւած ՀՀԿ Գործադիր մարմնի նիստից հետո: Ինչպես նշեց Գագիկ Մինասյանը, նիստին քննարկվել են ներկուսակցական խնդիրներին առնչվող հարցեր, դրանց լուծումները, տարածաշրջանային հնարավոր զարգացումների վերաբերյալ թեմաներ եւ գործընկեր կուսակցությունների հետ համագործակցության մասին:
«Միգուցե տարբեր ֆորմատներով, տարբեր կուսակցությունների հետ մենք համագործակցենք, սակայն այդ ամեն ինչը դեռ քննարկման փուլում է»,-հարցին ի պատասխան կրկնեց պարոն Մինասյանը: Նա ասաց, որ ՀՀԿ-ն կողմ է համագործակցության՝ կլինի դա կոալիցիայի տեսքով, թե մեկ այլ ձեւաչափով:
Գագիկ Մինասյանը նաեւ ասաց, որ քննարկվել է նաեւ էլեկտրոնային քվեարկության մեխանիզմի վերաբերյալ հարցերը, եւ պահանջվող ֆինանսական միջոցները այդ համակարգը ներդնելու համար չեն կարող խոչընդոտ հանդիսանալ, որպեսզի այն չներդրվի: Ըստ Գագիկ Մինասյանի կան միջազգային դոնոր կազմակերպություններ, որոնք պատրաստ են այդ հարցում աջակցելու. «ՀՀԿ-ն ոչ միայն կողմ է, այլեւ ջատագովն է այդ մեխանիզմի»,- նշեց Գագիկ Մինասյանը:
Կարդացեք նաև
Լուսինե ԲՈՒԴԱՂՅԱՆ
