«Բոլոր պետություններն էլ ձգտում են, որ Մարդու իրավունքների եվրոպական դատարանն իրենց դեմ վճիռներ չկայացնի։ Բայց կարող եմ ասել, որ Հայաստանը վատթարագույն վիճակում չի գտնվում այդ ցուցանիշներով։ Թույլատրվում են սխալներ, եւ այդ սխալներից հետո պետք է քայլեր իրականացվեն»,- այս մասին լրագրողների հետ զրույցում ասաց ՀՀ արդարադատության նախարար Արփինե Հովհաննիսյանը։
Հիշեցնենք, որ Մարդու իրավունքների եվրոպական դատարանը (ՄԻԵԴ) հունվարի 21-ին ընդդեմ Հայաստանի երեք գործով վճիռ է կայացրել: Երեք գործով էլ վճիռն ընդդեմ Հայաստանի է՝ հօգուտ դիմող կողմի: Վճիռներից երկուսը վերաբերում էին «Գույումչյանն ընդդեմ Հայաստանի», «Թովմասյանն ընդդեմ Հայաստանի» գործերին, որոնցում բավարարվել է դիմող կողմի պահանջը, և ՄԻԵԴ-ը գտել է, որ խախտվել է քաղաքացիների՝ Վճռաբեկ դատարան դիմելու իրավունքը:
Իսկ երրորդ՝ «Սաֆարյանն ընդդեմ Հայաստանի» գործն առնչվում է Սաֆարյանի բողոքին առ այն, որ նրան չի հաջողվել կիսել և փոխանցել Երևանի կենտրոնում գտնվող ունեցվածքը երեխաներին, ինչպես նաև պաշտոնապես գրանցել սեփական հողատարածքում կառուցած տաղավարը: Տաղավարը կառուցվել էր առանց թույլտվության 1993-ից առաջ:
Արփինե Հովհաննիսյանը նշեց, որ ՄԻԵԴ որոշումներից հետո եւ վերլուծություններ, եւ օրենսդրական բարեփոխումներ են լինում. «ՄԻԵԴ-ի ցանկացած որոշում հիմք է, որպեսզի վերլուծվի, թե որտեղ են եղել բացթողումները. օրենսդրական մակարդակո՞ւմ, թե՞ կիրառման արդյունքում։ Յուրաքանչյուր գործով մենք պետք է քայլերի հաջորդականություն ունենանք վերլուծությունից հետո»։
Կարդացեք նաև
Աշոտ ԻՍՐԱԵԼՅԱՆ
