ԱԺ էթիկայի հանձնաժողովն այսօր նիստում վարույթ է ընդունել ՀՀԿ խմբակցության պատգամավոր Շուշան Պետրոսյանի դեմ ներկայացված դիմումը:
Հիշեցնենք, պատասխանելով ֆեյսբուքյան օգտատերերից մեկի գրառմանը բանակի եւ պաշտպանության նախարարի վերաբերյալ, Շուշան Պետրոսյանը «սպառնացել» էր. «աչքերդ կհանեմ, լակոտ»: Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն էլ դիմել է ԱԺ էթիկայի հանձնաժողով`քննելու պատգամավորի վարքագիծը:
Հաջորդ նիստում, որը կկայանա փետրվարի 11-ին, ժամը 12-ին, հանձնաժողովի անդամները կլսեն Շուշան Պետրոսյանի եւ դիմող կողմի բացատրությունները: Այս հարցով զեկուցող է նշանակվել Խոսրով Հարությունյանը:
Լրագրող Լիլիթ Լալայանի դիմումը հանձնաժողովը նույնպես կքննարկի հաջորդ նիստում: Լրագրողը, հիշեցնենք, դիմել էր պատգամավորների կրկնակի քվեարկությունների հարցով: Այս հարցով էլ զեկուցող է նշանակվել Թեւան Պողոսյանը:
Կարդացեք նաև
Ի դեպ, արդեն լրացել են էթիկայի այս հանձնաժողովի լիազորությունները: Քիչ անց մեկնարկելիք խորհրդարանի հերթական նստաշրջանում արդեն հայտնի կդառնա հանձնաժողովի հաջորդ կազմը: Ըստ ԱԺ կանոնակարգ օրենքի, էթիկայի հանձնաժողովն ամեն նստաշրջանի վերակազմավորվում է: Իսկ նախագահությունն իրականացվում է ռոտացիոն կարգով: Այն այս անգամ կանցնի ՀՀԿ խմբակցությանը:
Հավելենք, որ ըստ «Առաջին լրատվականի»՝ Շուշան Պետրոսյանն ասել է լրագրողներին. «Իմ երկրին, պաշտպանության նախարարին, բանակին, սպային վիրավորող որևէ մարդ անընդունելի տարր է, վե՛րջ: Կուզենայի յուրաքանչյուրդ այդպես վերաբերվեք: Եթե աչքովս ընկավ նման գրառում, նույն կերպ կարձագանքեմ, ավելին կասեմ»:
Նելլի ԳՐԻԳՈՐՅԱՆ
