Վաշինգտոնը պատրաստվում է զգալիորեն ուժեղացնել Եվրոպայում ամերիկյան կոնտինգենտը՝ Մոսկվային «ազդանշան ուղարկելու» նպատակով, գրում է The New York Times-ը: Ըստ թերթի աղբյուրի՝ այդ նպատակի համար կհատկացվի 3.4 մլրդ դոլար:
Մասնավորապես, ԱՄՆ-ը նախատեսում է ակնհայտորեն ավելացնել ծանր սպառազինության և զրահամեքենաների տեղակայումը Կենտրոնական և Արևելյան Եվրոպայի երկրներում, գրում է պարբերականը՝ վկայակոչելով ԱՄՆ նախագահի աշխատակազմում իր աղբյուրը: Թերթի զրուցակցի խոսքով՝ Սպիտակ տունը պատրաստվում է 2017թ. Եվրոպայում ռազմական ծախսերին ուղղել ավելի քան 3.4 մլրդ դոլար, ինչը մի քանի անգամ գերազանցում է ընթացիկ ռազմական ծախսերը:
Զենքը և սարքավորումները կօգտագործվեն Եվրոպայում ամերիկյան զորքերի և ՆԱՏՕ-ի ուժերի կողմից: Թերթի զրուցակիցը նշել է, որ տարածաշրջանում ՆԱՏՕ-ի ուժերի ավելացումը նպատակ ունի ազդանշան ուղարկել Ռուսաստանի նախագահ Վլադիմիր Պուտինին: «Սա Եվրոպայի անվտանգության ոլորտում փոփոխությունների երկարաժամկետ արձագանքն է: Սա արտացոլում է նոր իրավիճակը, որում Ռուսաստանը խաղում է առավել բարդ դեր»,- ասել է պարբերականի աղբյուրը:
Պենտագոնում The New York Times-ի աղբյուրն էլ պատմել է, որ լրացուցիչ ուժերը և սարքավորումները կտեղակայվեն Եվրոպայի այնպիսի երկրներում, ինչպիսիք են Հունգարիան, Ռումինիան և Բալթյան երկրները:
Կարդացեք նաև
Սպիտակ տանը թերթի մեկ այլ աղբյուր հավելել է, որ նման քայլն անհրաժեշտ է՝ Մոսկվային ակնարկելու համար, որ ՆԱՏՕ-ն անհրաժեշտ ամեն բան կանի՝ Արևելյան Եվրոպայում դաշինքի անդամ-երկրներին պաշտպանելու համար: «Այդ բյուջեն հաստատելով՝ մենք կկատարենք ՆԱՏՕ-ին տված խոստումը դաշինքի հավաքական պաշտպանության շուրջ»,- ասել է թերթի աղբյուրը:
Այնուամենայնիվ, թերթը գրում է, որ նոր միջոցները կուղղվեն ոչ միայն Ռուսաստանին զսպելու համար: Հավելյալ զենքը և սարքավորումները կտեղակայվեն նաև ՆԱՏՕ-ի հարավային սահմաններում, որտեղ կօգտագործվեն «Իսլամական պետության» դեմ պայքարում:
Փետրվարի 2-ին ԱՄՆ պաշտպանության նախարար Էշ Քարթերը ելույթով հանդես կգա Վաշինգտոնի տնտեսական ակումբի անդամների առաջ և կպատմի Պենտագոնի առաջնահերթությունների մասին: 2017թ. ֆինանսական տարվա բյուջեի նախագիծը Օբամայի աշխատակազմը պատրաստվում է ներկայացնել փետրվարի 9-ին:
Պատրաստեց՝ Վիկտորյա ԱՆԴՐԵԱՍՅԱՆԸ