«Որեւէ կուսակցություն, սեփական դիրքն ընդգծելու համար կարիք չունի այլ կուսակցության ուսերին կանգնելու, որպեսզի երեւա: Այս պարագայում, կարծում եմ, ՀՅԴ-ն իր դերակատարությունն ընդգծելու համար կարող է փառքով օգտագործել իր 125 տարվա պատմության պատվանդանը»,- այսօր ԿԳ նախարար Արմեն Աշոտյանն ԱԺ-ում լրագրողների հետ զրույցում այսպիսի տեսակետ հայտնեց՝ ՀՀԿ-ՀՅԴ կոալիցիայի հետ կապված:
Դիտարկմանը՝ տարիներ շարունակ ՀՅԴ-ն կրթության ոլորտը վերցրել է իր ձեռքը՝ նախարարն արձագանքեց. «Կրթության ոլորտը մասնագիտական է: Կախված է նրանից նաեւ, թե որ քաղաքական ուժի ներկայացուցիչն է այդ պահին ղեկավարում, բայց ընդհանուր ռազմավարությունը նույնն է: Վերջին 25 տարիների ընթացքում այդ ռազմավարությունը միշտ եղել է նույնը: Նախարարների փոփոխությունները բերում են բացառապես տակտիկական փոփոխություններ, ոլորտային տեսակետից քաղաքականությունը նույնն է»:
Հարցին՝ ՀՀԿ-ն հեղինակազրկվա՞ծ է՝ Արմեն Աշոտյանը պատասխանեց, որ ինքը հպարտությամբ է կրում ՀՀԿ-ի կրծքանշանը եւ հպարտությամբ է կատարում ՀՀԿ-ի անդամ լինելու իր առաքելությունը»:
Կարդացեք նաև
Aravot.am-ի հետ զրույցում մեր հարցին՝ ՀՀԿ-ն խնդի՞ր ունի պատասխանատվությունը լղոզելու, դրա համա՞ր եք ՀՅԴ-ի հետ համագործակցության գնում՝ Արմեն Աշոտյանը պատասխանեց. «Մենք երբեւէ խուսափե՞լ ենք պատասխանատվությունից: Մենք պատասխանատվություն ենք ստանձնել երկրի համար ամենածանր ժամանակահատվածներում՝ արցախյան պատերազմից սկսած, իսկ քաղաքական առումով՝ 2008-ից առ այսօր համաշխարհային ճգնաժամերից, տարածաշրջանային լարումներից, մեծ քաղաքական կատակլիզմներից հետո: Մեզ շատ բաների մեջ կարող եք հանիրավի մեղադրել, բայց ոչ պատասխանատվությունից խուսափելու համար: Տղամարդկային կուսակցությունը, ինչպիսին իր պահվածքով, բնավորությամբ եւ պատմությամբ ՀՀԿ-ն է, պատասխանատվությունից չի կարող խուսափել»:
Հռիփսիմե ՋԵԲԵՋՅԱՆ
