«Գինեսի» գրքի ռեկորդակիր Մանվել Մամոյանին հաջողվել է 1 րոպեում 28 անգամ կատարել «Հենում-ծալում» վարժությունը: Ռեկորդի վկայականը մարզիկն օրերս է ստացել եւ այսօր ներկայացրեց «Նոյյան Տապան» լրատվական կենտրոնի մամուլի սրահում:
«Այս ռեկորդի համար բավականին քիչ եմ մարզվել` մի քանի օր, եւ գերազանցել եմ ուկրաինացի մարզիկի ցուցանիշը, ով րոպեում 20 անգամ էր կատարել վարժությունը»,-ասաց մարզիկը:
https://www.youtube.com/watch?v=5AI7OedVocQ
Մանվելի ռեկորդի մասին տեղեկատվությունն արդեն տեղադրվել է «Գինես»-ի կայքում: Նշվում է, որ ռեկորդը նվիրված է հայ եւ եզդի ժողովուրդների ցեղասպանության զոհերի հիշատակին: «Փորձեցինք մեր համայնքով նպաստել միջազգային ասպարեզում Հայոց ցեղասպանության եւ 1915թ. Օսմանյան Թուրքիայում սպանված եզդիների հարցերի բարձրացմանը: 1915 թվականին ոչ միայն հայ ժողովուրդը կորուստ ունեցավ, այլեւ եզդիները, հույները եւ ասորիները»,-նշեց Մանվել Մամոյանի կոորդինատոր, «Սինջար» եզդիների ազգային միավորման նախագահ Բորիս Մուրազին:
Կարդացեք նաև
Մանվել Մամոյանը հայտնեց, որ առաջիկայում նախատեսում է նաեւ «Դրոշակ» վարժության ռեկորդ սահմանել. «Ուղղահայաց ձողից պետք է 90 աստիճանի դիրք գրավեմ եւ այդպիսով նմանվեմ դրոշի»:
Մարզիկը վստահեցրեց, որ եւս հինգ ռեկորդ է սահմանել, պարզապես դեռեւս հայտեր չի ներկայացրել «Գինես»-ի ռեկորդների գրքում գրանցվելու համար: Գիրքն, ի դեպ, լույս է տեսնելու տարեվերջին: Իսկ մինչ այդ Մանվելը նախատեսում է եւս 10 ռեկորդ սահմանել:
«Գինես»-ում ռեկորդները բիզնեսի են վերածվել: Ասում են` եթե ռեկորդի պատասխանն ուզում եք մի քանի օրում ստանալ, վճարում եք 550 եվրո: Իսկ եթե ուզում եք ռեկորդը տեղում սահմանվի, հրավիրեք դատավորի: Անվճարի դեպքում 8-10 շաբաթում է գալիս ռեկորդը հաստատելու պատասխանը»,- հավելեց մարզիկը:
Լուիզա ՍՈՒՔԻԱՍՅԱՆ
