«Եթե ես այդ օրը չլինեի հրապարակում, եւ իմ թոռնիկները միայնակ լինեին, կարող է կրկնվեր Մարտի 1-ը»,- Aravot.am-ի հետ զրույցում, անդրադառնալով 2015 թվականի օգոստոսի 21-ին իր հետ կատարված միջադեպին, ասաց Հակոբ Նազարի Դեխնավին:
Ինչպես արդեն տեղեկացրել ենք, հենց այդ միջադեպի կապակցությամբ, երբ ոստիկանը հարվածել էր նրան, վարչական դատարանը մարտի 3-ին Դեխնավիի նկատմամբ տուգանք նշանակեց հիսուն հազար դրամի չափով:
Հակոբ Նազարի Դեխնավին նշեց, որ համարում է՝ այս դեպքում նշանակված տուգանքի գումարը կարեւոր չէ, բայց, այնուամենայնիվ, նա պատրաստվում է բողոքարկել վարչական դատարանի վճիռը վերաքննիչ վարչական դատարանում. «Միեւնույն ժամանակ, եթե վերադասին եմ բողոքս հայտնում, դա չի նշանակում, որ դատավորին եմ անարգում, կարող է դատավորին վերեւից ստիպել են, որ այդպիսի որոշում կայացնի, ես դրա մեջ չեմ կասկածում: Դա Բաղրամյան 26-ից իջեցրած հրահանգ է: Ես ուզում եմ զուտ լինել իմ տեղում, այսինքն՝ եթե բողոք եմ ներկայացնում, ես ի վիճակի եմ ինձ պաշտպանելու եւ հաստատ կպաշտպանեմ եւ կապացուցեմ, որ որոշումը սխալ է եղել, որովհետեւ դեռ մյուս գործն առջեւում է, որտեղ ես տուժող եմ եղել, այսինքն՝ ականջս խլացել է»:
Հակոբ Նազարի Դեխնավին նշեց, որ դատարանը անտեսել է իր միջնորդությունները՝ երկրորդ գործերը միավորել մի վարույթում. «Ինքը չի արել, ուրեմն՝ իրեն այդպես են ասել, վնաս չկա: Հիմա ես վերադաս կտամ: Ցանկանում եմ մինչեւ մահս աստված ինձ ժամանակ տա, որ մեր սերունդներին թողնեմ շատ ընտիր հայրենիք»:
Կարդացեք նաև
Ամի ՉԻՉԱԿՅԱՆ