Թուրքիայի Ժողովրդահանրապետական կուսակցության հայազգի պատգամավոր Սելինա Դողանը հարցում է ներկայացրել Թուրքիայի կառավարությանը՝ այդ երկրի Պետական արխիվում և Մշակույթի նախարարությունում՝ պոլսահայ «Ժամանակ» օրաթերթի արխիվները առկայությունը ստուգելու համար։ Այս մասին տեղեկացնում է «Ակօս» լրատվական կայքը։
Ի պատասխան հայազգի պատգամավորի հարցումի՝ կառավարությունը նշել է, որ Պետական արխիվում բացակայում են «Ժամանակ» օրաթերթի արխիվները։ Սրանից հետո Դողանը նույն հարցումն ուղղել է Թուրքիայի Մշակույթի նախարար Մահիր Ունալին։ Հայազգի պատգամավորը դեռևս պատասխան չի ստացել Թուրքիայի Մշակույթի նախարարությունից։
Թեմայի մասին Սելինա Դողանը խոսել է «Ակօսի» լրագրողի հետ. «Ժամանակը» Թուրքիայի ամենահին թերթն է, որը հրատարակվել է առանց ընդմիջման։ Օրաթերթը տպագրվել է ե´ւ Օսմանյան կայսրության, ե´ւ հանրապետական Թուրքիայի օրոք։
Քաղաքական այս մտածելակերպից, որը Հայոց ցեղասպանության թեման բացվելուն պես գերադասում է «բացենք արխիվները» արտահայտությամբ պարտակել թեման, նախ և առաջ ակնկալվում է այս երկրում ապրող հայերի ամենահին պարբերականի արխիվացումը»։
Տեղեկացնենք, որ «Ժամանակը» ստամբուլահայ մամուլի ամենահին օրգաններից է, հիմնադրվել է 1908թ. և տպագրվում է առ այսօր՝ առանց ընդհատումների։ Տարբեր ժամանակներում թերթին թղթակցել են անվանի հայ մտավորականներ Արշակ Չոպանյանը, Զապել Եսայանը, Վահան Թեքեյանն ու Երվանդ Օտյանը։ Ներկայումս թերթի տպաքանակը շուրջ 1500 է, սպառողների հիմնական մասը Ստամբուլի հայկական համայնքն է։ Թերթի խմբագիրը Արա Գոչունյանն է։
