Աջափնյակ եւ Դավիթաշեն վարչական շրջանների ընդհանուր իրավասության դատարանում, դատավոր Վարդան Աբրահամյանի նախագահությամբ, օրեր առաջ շարունակվեց Հարություն Մկրտչյանի եւ Արգիշտի Գոմցյանի քրեական գործով դատական նիստը: Հիշեցնենք, որ շտապօգնության մեքենայով «Արմենիա» բուժկենտրոն ալկոհոլային թունավորման ախտորոշմամբ տեղափոխված Հարությունը կաթիլայինը միացնելուց վայրկյաններ անց դուրս է փախչել հիվանդասենյակից, կիսամերկ հարձակվել է անվտանգության աշխատակիցների վրա, շրջել թթվածնի բալոնը, իր ընկերոջ հետ ստացել են տասնյակ մարմնական վնասվածքներ:
Տուժող Վ. Ղազարյանի եւ վկա Դ. Վահանյանի՝ ՌԴ մեկնելու կապակցությամբ հրապարակվեցին եւ հետազոտվեցին վերջիններիս նախաքննական ցուցմունքները, որոնց արդյունքում ի հայտ եկան բազմաթիվ հակասություններ դատաքննությամբ ձեռք բերված ապացույցների հետ: Մասնավորապես, թթվածնի բալոնը Հարություն Մկրտչյանի կողմից շպրտելու, ոստիկանության աշխատակիցների հետ վիճաբանության մտնելու եւ հարվածներ հասցնելու կապակցությամբ եւ մի շարք այլ հարցեր, որոնք խիստ կարեւոր են այս գործի ելքի ճիշտ լուծման համար:
Հարություն Մկրտչյանի պաշտպան, ՀՀ փաստաբանների պալատի անդամ Վահագն Մանուկյանի կողմից այդ ցուցմունքների հետ կապված հայտնվել է անհամաձայնություն, մատնանշվել բազմաթիվ հակասություններ: Պաշտպանը հայտնեց, որ առանց այդ վկաների հարցաքննության, առանց նրանց հարցեր տալու, հնարավոր չէ փարատել եղած բոլոր կասկածները: Պաշտպանը տեղեկացրեց, որ վկաներից մեկը, որը ներկայումս գտնվում է ՌԴ-ում, ոստիկանության պահպանության բաժնի աշխատակից է եւ որ նրա՝ ՌԴ մեկնելը խիստ կասկածելի է` առանց աշխատանքից ազատվելու կամ գործուղման մեկնելու պատճառաբանության: Ի դեպ, դատարանն այս հանգամանքը չէր ստուգել եւ չէր պարզել, այլ բավարարվել էր այն տեղեկությամբ, որը ստացվել էր: Տուժող ոստիկանի՝ Գ. Մարդանյանի վերաբերյալ որոշում է կայացվել նրան բերման ենթարկելու մասին:
Դատական հաջորդ նիստը նշանակվել է մարտի 9-ին:
Ռ. ՄԻՆԱՍՅԱՆ
Կարդացեք նաև
«Առավոտ» օրաթերթ
08.03.2016
