«Կորիզավոր պտղատու այգիներն անհրաժեշտ է ծխածածկել եւ առատ ոռոգել». գյուղատնտեսության նախարարությունը այսպիսի sms-ներ է ուղարկում մեր քաղաքացիներին՝ զգուշացնելով, որ հատկապես մարտի 18-19-ի գիշերը սպասվում է ցրտահարություն: Նախօրեին ԱԺ-ում գյուղնախարար Սերգո Կարապետյանն էլ հորդորեց այդ մեթոդներով դիմակայել ցրտին:
Իսկ ահա երեւանյան ֆերմերները նախարարի հորդորը թողած՝ իրենց ծիրանենիները, բողբոջած ծառերը ցրտից պաշտպանելու այլ մեթոդների են դիմում: Ով տանը ինչ տաք ծածկոց, «դոշակ ու վերմակ» ունի՝ բերում փաթաթում է ծառերի վրա: Բանը հասել է նրան, որ անգամ մանկական վերմակն են տնից բերում՝ ծառերին փաթաթելու համար:
Ի տարբերություն այս հայկական մեթոդների՝ արտերկրում հատուկ ծխագնդիկներ են վաճառում, ոչ թե մերոնց նման ծղոտից ինքնաշեն ծխակույտ պատրաստում: Նաեւ օգտագործում են ցողապատման մեթոդը՝ ցողը շաղ են տալիս, այն սառցակալում է եւ պաշտպանում բողբոջները:
Լուսանկարները՝ ՀՌԻՓՍԻՄԵ ՋԵԲԵՋՅԱՆԻ
«Առավոտ» օրաթերթ
18.03.2016
