Այսօր՝ ապրիլի 2-ին, տեղի ունեցավ «Հայկական վերածնունդ» կուսակցության կառավարման խորհրդի նիստը, որը վարել է կուսակցության նախագահ Արթուր Բաղդասարյանը: Նիստը սկսվել է ԼՂՀ սահմանին տիրող իրավիճակի քննարկմամբ:
Հաշվի առնելով ստեղծված աննախադեպ լարված իրադրությունը «Հայկական վերածնունդ» կուսակցությունը խստորեն դատապարտում է Ադրբեջանի Հանրապետության նախահարձակ գործողությունները և գտնում է, որ ստեղծված իրավիճակը ևս մեկ անգամ փաստում է, որ ալիևյան ռեժիմի ձեռագիրը չի փոխվում ու նման սադրանքներով փորձ է արվում շեղել Ադրբեջանի բնակչության ուշադրությունը երկրի ներսում ստեղծված խնդիրներից, ինչպես նաև շանտաժի միջոցով փորձել ազդեցություն գործել ԼՂՀ հակամարտության խաղաղ կարգավորման բանակցային գործընթացի վրա:
Եվս մեկ անգամ խստորեն դատապարտելով Ադրբեջանի լկտի և սանձարձակ գործելաոճը «Հայկական վերածնունդ» կուսակցությունն իր ցավակցությունն է հայտնում զոհված զինծառայողների և խաղաղ բնակչության շրջանում զոհերի հարազատներին և կոչ անում միջազգային հանրությանն ու կոմպետենտ միջազգային կառույցներին խստորեն դատապարտել Ադրբեջանի նախահարձակ և հանցավոր գործողությունները, որոնք վտանգի տակ են դնում ողջ տարածաշրջանի՝ առանց այն էլ խոցելի անվտանգությունը:
Միևնույն ժամանակ հայտնում ենք, որ ՀՎԿ «Ազատամարտիկների միությունը» պատրաստ է ցանկացած պահի կանգնել հայ զինվորի կողքին` առաջնագծում հայրենիքի սահմանների պաշտպանության և թշնամուն արժանի հակահարված տալու գործում: Ավելին, ՀՎԿ «Ազատամարտիկների միության» մի շարք ներկայացուցիչներ արդեն իսկ պատրաստակամություն են հայտնել այսօր մեկնել ԼՂՀ:
Կարդացեք նաև
«Հայկական վերածնունդ» կուսակցության կառավարման խորհրդում քննարկվել են նաև ներկուսակցական մի շարք հարցեր: Մասնավորապես, ՀՎԿ նախագահ Արթուր Բաղդասարյանը Կառավարման խորհրդի անդամներին է ներկայացրել ս.թ. մարտի 20-28-ը Եվրոպայի մի շարք խոշոր երկրներում և ՌԴ մայրաքաղաք Մոսկվայում տեղի ունեցած կուսակցության պատվիրակության այցելությունների, քաղաքական կարևոր հանդիպումների, ինչպես նաև Մոսկվայում հիմնադրված «Հայկական վերածնունդ» համառուսաստանյան հասարակական կազմակերպության հիմնադիր համագումարի մասին:
ՀՎԿ Կառավարման խորհրդում քննարկվել են նաև Հանրապետության մի շարք համայնքներում ս.թ. ապրիլի 17-ին տեղի ունենալիք ՏԻՄ ընտրություններին, ինչպես նաև ներկուսակցական կազմակերպչական խնդիրներին վերաբերող հարցեր:
«Հայկական վերածնունդ» կուսակցության մամուլի հաղորդագրություն
