«Ադրբեջանի գործողություններում որոշակի պատճառներ կան` ներքին իրավիճակ, նավթի գների անկում: Վաշինգթոնում Ալիեւը դարձավ մարդ, որի հետ բանակցային գործընթացը շարունակելն անհրաժեշտ է, բայց անհասկանալի է, թե ինչ սկզբունքներով: Մինսկի խումբը վստահ է, որ իրավիճակը պետք է կարգավորել խաղաղ ձեւով: Արդյունքում, ունենք իրավիճակի սրում, ինչից հետո` հակահարձակում, Ադրբեջանի կողմից նյութական եւ մարդկային զոհեր: Արդյունքում` Ադրբեջանին նորից պետք է բերել բանակցային սեղանի շուրջ»,-այսօր «Մեդիա կենտրոն»-ում տեղի ունեցած քննարկման ժամանակ ասաց քաղաքագետ Ալեքսանդր Մարգարովը` խոսելով այսօր ղարաբաղաադրբեջանական շփման գոտում իրավիճակի շեշտակի սրման մասին:
Քաղաքագետ Աղասի Ենոքյանն էլ հիշեցրեց, որ Մինսկի խմբի համանախագահները հաջորդ շաբաթ հանդիպելու են Վիեննայում` փոփոխված օրակարգով. «Կխոսեն ավելի կոնկրետ քայլերի մասին, որովհետեւ իրավիճակ է փոխվել»:
Անդրադառնալով ՌԴ նախագահ Վլադիմիր Պուտինի արձագանքին` Ենոքյանը նկատեց, որ Ադրբեջանը ռուս-թուրքական հարաբերությունների սրացումից ի վեր հստակ ընտրություն չի կատարել` թուրքական ճանապարհին է կանգնած, թե ռուսական. «Ռուսաստանն Ադրբեջանին ցույց է տալիս, որ այլ տարբերակ չունի: Եթե Մինսկի խումբը դանդաղ է աշխատում, Ռուսաստանի համար ղարաբաղյան հակամարտությունը ռուսական ձեւով լուծելու հնարավորություն է ստեղծվում, այն է` հակամարտության գոտում ռուս խաղաղապահների տեղակայումը: Այս պատճառով էլ Ռուսաստանը րոպեի ճշտությամբ հետեւում է իրավիճակի զարգացումին»:
Քաղաքագետ Ստեփան Գրիգորյանի բնորոշմամբ էլ` Ռուսաստանը ցույց տվեց, որ լուրջ հետաքրքրություններ ունի, այդ պատճառով էլ արձագանքեց. «Հայաստանը, որպես ՄԱԿ-ի անդամ-պետություն, պարտավոր է պահանջել հրավիրել ՄԱԿ-ի անվտանգության խորհրդի արտահերթ նիստ: Հայաստանը չպետք է բավարարվի Մինսկի խմբի համանախագահներով: Մեր երկրի քայլերն այստեղ շատ կարեւոր են»:
Կարդացեք նաև
Լուսանկարը` «Մեդիա կենտրոն»-ի
Լուիզա ՍՈՒՔԻԱՍՅԱՆ
