Հայտարարություն
«Հայկական Վերածնունդ» հասարակական-քաղաքական միավորման նախագահ Արթուր Բաղդասարյանը հանդես է եկել կոչով պետական սահմանի վերազինման և սահմանամերձ տարածաշրջանների աջակցության նախաձեռնություն ստեղծելու մասին, որտեղ մասնավորապես ասված է.
– Հաշվի առնելով ադրբեջանական վերջին ագրեսիան Լեռնային Ղարաբաղի Հանրապետության դեմ
– Խորապես մտահոգված լինելով դիպուկահարների, ծանր հրետանու կիրառման, դիվերսիոն խմբերի գործողությունների ակտիվացման փաստով
Կարդացեք նաև
– Անթույլատրելի համարելով Ադրբեջանի կողմից ագրեսիվ ռազմական գործողությունների շարունակական աճը և ակտիվացումը նաև ՀՀ սահմանամերձ տարածաշրջանում
– Ելնելով այն փաստից, որ երրորդ սերնդի պատերազմի ժամանակաշրջանում պաշտպանության կարևորագույն մեխանիզմներն են հանդիսանում սահմանային մշտադիտարկման, հակառակորդի հետ շփման գծի տեխնիկական վերահսկողության իրականացումը ժամանակակից սարքավորումների միջոցով
– Գերակա համարելով մեր զինծառայողների անվտանգության և պաշտպանվածության ապահովման հրամայականը
– Միանշանակորեն համարելով, որ պետությունը և հասարակությունը պետք է պաշտպանեն իրենց զինվորին, ինչպես զինվորները պաշտպանում են ազգին և ժողովրդին
– Նպատակ հետապնդելով ձևավորել համապատասխան միջոցներ և գործիքակազմ աջակցելու համար սահմանների վերազինման կարևորագույն հրամայականին
– Խնդիր դիտարկելով ձևավորել համապատասխան մեխանիզմ բոլոր շաhագրգիռ անձանց և կազմակերպությունների համար, որոնք ցանկություն կունենան մասնակցել սահմանների արդիականացման և տնտեսական վերազինման աջակցության հայրենանվեր գործին:
Հայտարարում եմ.
Պետական սահմանների տեխնիկական վերազինման և սահմանամերձ տարածաշրջաններին աջակցության ազգային նախաձեռնության մասին, որի շարունակական զարգացումը կարող է վերաճել հատուկ հիմնադրամի ստեղծման, որի առաքելությունը կլինի վերազինել մեր սահմանային ենթակառուցվածքները տեսանկարահանող սարքերով, կապի ժամանակակից համակարգով և ինչու ոչ նաև նպաստել սահմանամերձ տարածաշրջանների անվտանգության բարձրացման հայրենանվեր առաքելությանը:
Շնորհակալություն եմ հայտնում այն ավելի քան 150 հասարակական կազմակերպություններին, ովքեր պատրաստակամություն են հայտնել աջակցել իմ նախաձեռնությանը
Շնորհակալություն եմ հայտնում ավելի քան 150 գործարարներին և կազմակերպություններին Հայաստանից, Ռուսաստանից և սփյուռքի այլ բնակավայրերից, ովքեր պատրաստակամություն են հայտնել սատարել իմ նախաձեռնությանը
Երախտիքի խոսք եմ հղում բոլոր այն ԶԼՄ-ների ղեկավարներին, ովքեր պաշտպանում են իմ այս նախաձեռնությունը, որի առաջին արտացոլումը կդրսևորվի ապրիլի 22-ին Հ3 հեռուստաընկերության կողմից կազմակերպվող հեռուսամարաթոնի ժամանակ
Վստահ եմ, որ հայրենիքի համար այս դժվարին ժամանակաշրջանում բոլորս պետք է միաբանվենք ու համախմբվենք՝ ներդնելով մեր լավագույն ջանքերը և հնարավորությունները աջակցելու հայրենիքի պաշտպանության սոււրբ և ազգանվեր գործին:
Առաջիկա օրերին կներկայացնեմ նախաձեռնությունը սատարող կազմակերպությունների և անհատների ցանկը:
Երախտապարտ կլինեմ օգտակար առաջարկությունների և աջակցության համար:
