«Ականատես եղանք մեր ժողովրդի աննախադեպ համախմբման: Մեր ժողովուրդն ինքը համախմբվեց եւ օրինակ ծառայեց քաղաքական ուժերին»,-այսօր «Հայելի» մամուլի ակումբում ասաց Հայաստանի գիտությունների ազգային ակադեմիայի գրականության ինստիտուտի տնօրեն Վարդան Դևրիկյանը, որը ապրիլի սկզբին «Երկրապահ կամավորականների միության» կազմում եղել է առաջնագծում:
«Այնքան կենսական ուժ ունի մեր ժողովուրդը, որ անգամ հողագործ ազատամարտիկն իր ավտոմեքենայով էր եկել` իր ընկեր ազատամարտիկների հետ միասին: Արցախյան ազատամարտի մասնակիցների թվում գնդապետ ու փոխգնդապետ կային, բայց իրենք չէին ասում, թե ցանկանում են դիրքի պատասխանատու լինել, այլ ենթարկվում էին ավագ սերժանտին: Սա հոգեբանական կարեւոր պահ է»,-տպավորությունների մասին պատմեց Դեւրիկյանը:
Նրա խոսքով` քառօրյա պատերազմը կրկնեց Արցախյան պատերազմի պատմությունը. «Նկատի ունեմ` նույն ուղղության վրա` այն պահին, երբ մեր ուժերն իրենց կամքն էին թելադրում, զինադադարի մասին բանավոր պայմանավորվածությունը եղավ: Ադրբեջանի հարվածից հետ ակնհայտ դարձավ, որ կարող ենք դիմագրավել եւ առաջ գնալ: Ազատամարտիկների ներկայությունը կարեւոր գործոն է. մեզ տեսնելուց զինվորներն ինքնաբուխ ասում էին` «հոպարները եկան»:
Հետաքրքիր միջինացված տարիք ստեղծվեց դիրքերում: Բոլորը կամավոր եկան: Բանից պարզվեց` ավելի հեշտ է մարդկանց զոռով հավաքելը, քան կամավորներին ասելը` մի գնա սահման»:
Կարդացեք նաև
Լուիզա ՍՈՒՔԻԱՍՅԱՆ
