Այսօր առավոտյան Հայաստանի ԱԳՆ-ում կայացավ Հայաստանի արտգործնախարար Էդվարդ Նալբանդյանի և Ռուսաստանի Դաշնության արտաքին գործերի նախարար Սերգեյ Լավրովի բանակցությունները, որից 40 րոպե ուշացումով մեկնարկեց երկու երկրների արտաքին գործերի նախարարների համատեղ մամլո ասուլիսը:
Սերգեյ Լավրովը իր ներածական խոսքում նշեց, որ բանակցությունները ցույց տվեցին, որ արդյունավետ են աշխատում Հայաստանի հետ երկկողմ համագործակցության ոլորտում եւ միջազգային կառույցներում, մասնավորապես ՀԱՊԿ-ի շրջանակներում, որում Հայաստանը ղեկավարում է այս տարի:
Անդրադառնալով ղարաբաղյան հակամարտությանը, նա նախ ցավակցեց ապրիլյան բռնության բռնկման արդյունքում զոհվածների հարազատներին:
«Այս հակամարտությունը չունի ռազմական լուծման ուղի եւ պետք է հաղթահարվի բացառապես քաղաքական, դիվանագիտական ճանապարհով: Այս փուլում մենք առաջնահերթ ենք համարում 1994 եւ 1995թթ. ընդունված համաձայնագրերի անվերապահ պահպանումը` զինադադարի ռեժիմի վերաբերյալ, որը պետք է բոլորի կողմից հարգվի: ՌԴ-ն որպես ԵԱՀԿ ՄԽ-ի եռանախագահող` ամեն ինչ կանի, որպեսզի կողմերին աջակցի այս փուլում` վստահության ամրապնդման, անվտանգության միջոցների պահպանման, միջադեպերի ուսումնասիրության հարցում, որը համաձայնացվել էր Հայաստանի եւ Ադրբեջանի նախագահների կողմից` ՌԴ միջնորդությամբ 2011 թվականին, որի կյանքի կոչման համար աշխատում էր ԵԱՀԿ-ն: Մենք ընդհանուր առմամբ գոհ ենք բանակցություններից արդյունքներից»,- ասաց Լավրովը:
Կարդացեք նաև
Ապրիլյան պատերազմի օրերին Թուրքիայի իշխանությունների հայտարարությունների առնչությամբ վերաբերող հարցին ի պատասխան Լավրովը նշեց. «Թուրքական ղեկավարության կողմից հայտարարությունները բացարձակ անընդունելի են, մի պարզ պատճառով, դրանք ուղղված էին ոչ թե խաղաղությանը, այլ` պատերազմին, հակամարտության ռազմական լուծմանը»: Նա նաեւ հավելեց, որ այս փուլում սկզբունքային են համարում, պետք է անել ամեն ինչ, որպեսզի պահպանվի հրադադարի ռեժիմի անվերապահ կայացումը:
Ռուսաստանի արտաքին գործերի նախարար Սերգեյ Լավրովը ԼՂ հարցում Ռուսաստանի հետագա կոնկրետ քայլերին անդրադառնալով` նշեց, թե սկզբունքային է համարում թույլ չտալ` այնպիսի խախտումներ, որոնք կվնասեն հրադադարի պահպանմանը: Նրա խոսքով` վերջին տարիներին Ռուսաստանի միջնորդությամբ համաձայնեցվել են քայլեր, որոնք պետք է կյանքի կոչել: «2011թ. ԵԱՀԿ-ն ճանապարհային քարտեզ էր պատրաստել, թե ինչպես է պետք առաջ ընթանալ այդ քայլերում։ Կարեւոր է, որպեսզի Գերմանիան՝ որպես ԵԱՀԿ-ում նախագահող երկիր, որը մեծ հետաքրքրություն է ցուցաբերում հակամարտությունների կարգավորմանը, հետաքրքրություն ցուցաբերի նաեւ այստեղ: Պետք է նպաստենք, որպեսզի Բեռլինը գիտակցի իր պատասխանատվությունը», հայտարարեց Լավրովը։
Ի դեպ, Լավրովն այսօր Երեւանում նաեւ ամրագրեց, որ Հայաստանը Կազանի փաստաթուղթը չի մերժել:
Էմմա ԳԱԲՐԻԵԼՅԱՆ
