Ս.թ. մայիսի 3-ին ԵՊՀ Եվրոպական ուսումնասիրությունների կենտրոնի Ռոբերտ Շումանի անվան սրահում տեղի է ունեցել Եվրոպական ակումբի բացումը: Բացման խոսքով հանդես են եկել Հայաստանում ԵՄ պատվիրակության ղեկավար, դեսպան Պյոտր Սվիտալսկին և Եվրոպական ուսումնասիրությունների կենտրոնի տնօրեն Արթուր Ղազինյանը:
«Եվրոպական ակումբը» ստեղծվել է Երևանի պետական համալսարանի Եվրոպական ուսումնասիրությունների կենտրոնի և Հայաստանում ԵՄ պատվիրակության հետ համատեղ: Եվրոպական ակումբի նպատակն է համախմբել գիտնականների և փորձագետների հայկական և եվրոպական համալսարաններից և հետազոտական կենտրոններից Հարավային Կովկասում և մասնավորապես Հայաստանում միջազգային և տարածաշրջանային քաղաքականությունների, ինչպես նաև ԵՄ քաղաքականության վերաբերյալ առողջ քննարկումներ և բանավեճեր խթանելու և անցկացնելու նպատակով: Քննարկումներին հրավիրվում են հայտնի փորձագետներ` որպես բանախոսներ: Քննարկումները տեղի են ունենում <Չատամ Հաուսի> կանոններով`փակ քննարկման ձևաչափով:
Ակումբի առաջին քննարկումը նվիրված էր «ԵՄ-ի և Ռուսաստանի աշխարհաքաղաքական և աշխարհատնտեսական շահերի համընկման և բախման հեռանկարները» թեմային:
Միջոցառմանը մասնակցել են Հայաստանում ԵՄ պատվիրակության անդամներ, ՀՀ հավատարմագրված դիվանագիտական առաքելությունների, ինչպես նաև պետական, միջազգային և հասարակական կազմակերպությունների ներկայացուցիչներ, ուսանողներ, հետազոտողներ, փորձագետներ և լրատվամիջոցների ներկայացուցիչներ:
Centre for European Studies
