Կովկասի ինստիտուտի փոխտնօրեն, քաղաքագետ Սերգեյ Մինասյանն այսօր «Փաստարկ» ակումբում անդրադառնալով Ռուսաստանի Դաշնության արտաքին գործերի նախարար Սերգեյ Լավրովի՝ «Արցախի Հանրապետությունը ճանաչելու մասին» օրենքի նախագծի վերաբերյալ հայտարարությանը, նկատեց.«Ռուսաստանն, իսկապես, փորձում է նախաձեռնություն ցույց տալ, ինչ-որ միջոցներ ձեռնարկել ոչ թե բուն բանակցությունների վերսկսման գործընթացում՝ մադրիդյան սկզբունքների կամ այլ ավելի լայն համատեքստում, որովհետեւ այս պահին դա իրատեսական չէ, այլ շփման գծում, այսպես կոչված՝ վստահության մեխանիզմների ձեւավորման առումով: Միջազգային հանրությունը փորձում է միջոցներ ձեռնարկել շփման գծում վստահության մեխանիզմներ ձեւավորելու ուղղությամբ: Եվ սա միգուցե Իլհամ Ալիեւի համար հնարավորություն ստեղծի դուրս գալ այս փակուղուց: Այսինքն՝ կարող է լուծել ներքաղաքական խնդիրը, թե՝ ինչ պատրվակով կարող է վերադարձնել զորքերն իրենց նախկին տեղերը»:
Մանրամասն՝ տեսանյութում
Հարցին՝ հակամարտող կողմերից ո՞ր երկրին է առավելապես շահավետ վերսկսելու ռազմական գործողությունները, Սերգեյ Մինասյանն ասաց, որ իրականում, ոչ մեկի շահերից չի բխում, առաջին հերթին դա չի բխում Ադրբեջանի շահերից. «Որովհետեւ, ես համոզված եմ՝ ելնելով նաեւ որոշ ռազմաքաղաքական վերլուծություններից, Ադրբեջանը եթե սկսի լայնածավալ պատերազմ, ինքը որեւէ հաջողության չի կարող հասնել: Ուշ, թե՝ շուտ դա բերելու այն հետեւանքներին, ինչ որ բերել է 90- ական թվականներին: Այլ բան է, որ ոչ ոք, ո՛չ Հայաստանը, ո՛չ Լեռնային Ղարաբաղը չի ցանկանա մինչեւ դրան հասնի: Հայաստանն այս իրավիճակին, ե՛ւ մինչեւ ապրիլը, չեմ կարծում որեւիցե լայնամասշտաբ գործողություններ սկսելու նպատակներ ունի»:
Կարդացեք նաև
Մանրամասն՝ տեսանյութում
Նելլի ԲԱԲԱՅԱՆ
