Այսօր Պետեկամուտների փոխնախագահ Վախթանգ Միրումյանից լրագրողները հետաքրքրվեցին, թե ի՞նչ են պատրաստվում անել պանամական օֆշորներում գրանցված Միհրան Պողոսյանի եւ այլ քաղաքացիների հետ: Նա ասաց, որ պետք է ցանկն ուսումնասիրվի. «Որեւէ արտահերթ քայլ Պետեկամուտների կոմիտեն իրավասություն չունի անելու»:
Հարցին՝ եթե «վերեւից» հրահանգ ունենաք, արդեն կանե՞ք՝ նա պատասխանեց. «Պետեկամուտների կոմիտեն գործում է բացառապես օրենսդրությամբ իրեն վերապահված լիազորությունների շրջանակներում: Եթե կա սահմանված ընթացակարգ ստուգումներ իրականացնելու, բնականաբար այդ ընթացակարգով պետք է շարժվենք»:
Երբ լրագրողները հիշեցրին՝ դուք քննչական մարմին ունեք՝ նա պատասխանեց. «Այո, բայց քննչական մարմինը պետք է ստանա համապատասխան քննիչի որոշում կամ գործ, որի հիման վրա իրականացնի»: Թե ումի՞ց պետք է ստանա, ո՞վ պետք է տա այդ գործը՝ Վախթանգ Միրումյանն այդպես էլ չասաց՝ համապատասխան մարմիններից:
Հարցին՝ այն, որ պետք է հարկային պարտավորություններն իրենց կատարեին, բայց օֆշորում են գրանցվել, չեն կատարել, դա ՊԵԿ-ի գործը չէ՞՝ նա պատասխանեց. «Դա հարկային մարմինների գործն է, իհարկե: Եթե քրգործ կա հարուցված, եթե դրա շրջանակներում կստանա համապատասխան որոշում՝ իրականացնելու ստուգումներ, բնականաբար, կիրականացնի»:
Կարդացեք նաև
Հարցին՝ այդքան մամուլում գրվում էր, որ Միհրան Պողոսյանը օֆշորային բիզնեսներ ունի, ձեր մտքով չէ՞ր անցնում ստուգումներ անել՝ Վախթանգ Միրումյանը պատասխանեց. «Եթե ՀՀ որեւէ քաղաքացի որեւէ օֆշորոմ ունի հիմնադիր մասնակցություն, արդյո՞ք Պետեկամուտների կոմիտեն կարող է վեր կենալ եւ գնալ օֆշոր ստուգել»:
Հարցին՝ քանի՞ անգամ եք ստուգումներ արել «Քեթրին գրուպում» կամ Միհրան Պողոսյանին պատկանող որեւէ ընկերությունում՝ նա վստահեցրեց, որ ստուգումներ արել են, թե քանի անգամ՝ վիճակագրական տվյալներ չունի, պատրաստ չի եկել ԱԺ:
Հռիփսիմե ՋԵԲԵՋՅԱՆ
