Ուկրաինայում Հայաստանի դեսպան Անդրանիկ Մանուկյանը հերքեց, թե Ուկրաինայի Լվով քաղաքում նախօրեին հայերի եւ ադրբեջանցիների միջեւ տեղի ունեցած միջադեպով քրեական գործ էր հարուցվել:
«Այսօր հանդիպել են հայ եւ ադրբեջանական համայնքի ներկայացուցիչները, մարզային ոստիկանապետի մոտ ու պայմանավորվել են հաշտության գալ եւ այդ միջադեպերն այլեւս չշարունակեն»,- Aravot.am-ին ասաց դեսպանը:
Նա ասաց, որ միջադեպը եղել է դեսպանատան անմիջական վերահսկողության ներքո, եւ իրենք ամեն ինչ արել են, որ խնդիրը չխորանա. «Հայաստանի ու Ադրբեջանի մարզիկների միջեւ տեղի ունեցած միջադեպի առթիվ ես համապատասխան նոտաներ եմ ուղարկել Ուկրաինայի Արտաքին գործերի նախարարությանը եւ համապատասխան կառույցներին` պահանջելով, որ մեղավորները պատասխանատվության ենթարկվեն: Ինչ վերաբերում է մայիսի 16-ին տեղի ունեցած միջադեպին, ապա ես իրավապահների հետ կապի մեջ եմ, համապատասխան մարմինների հետ զրուցել եմ, որ անվտանգության միջոցառումները խստացվեն»:
Հիշեցնենք, որ Ուկրաինայի Լվով քաղաքում մայիսի 12-15-ն անցկացվող Կունգ-ֆուի Եվրոպայի առաջնության ժամանակ զանգվածային ծեծկռտուք է եղել հայ եւ ադրբեջանցի մարզիկների ու նրանց համախոհների միջեւ: Արցախցի Դավիթ Պետրոսյանի մեծ առավելությամբ պարտված Ադրբեջանի թիմի մարտավկան փորձել է հարվածել հայ մարզիկին, որին միացել են նաեւ ռինգում գտնվող նրա ադրբեջանցի մրցակիցը, ապա ադրբեջանական թիմի մարզիչներն ու մարզիկները՝ մահակներով: Միջադեպը շարունակվել է նաեւ մայիսի տասնվեցին:
Կարդացեք նաև
Արփինե ՍԻՄՈՆՅԱՆ
