«Գերմանաթուրքական հարաբերությունները, ինչպես նաեւ Եվրամիություն-Թուրքիա հարաբերությունները այսօր գտնվում են բավական բարդ փուլում, եւ Եվրոպային անհրաժեշտ են զսպող մեխանիզմներ»,- հունիսի 4-ին «Դիալոգ» մամուլի ակումբում լրագրողների հետ հանդիպման ընթացքում ասաց թուրքագետ Ռուբեն Մելքոնյանը:
Նա հետաքրքիր է համարում այն հանգամանքը, որ Գերմանիայի Բունդեսթագում Հայոց ցեղասպանության ճանաչման բանաձեւին կողմ է քվեարկել թուրքական արմատներ ունեցող 11 պատգամավոր. «Եվ հիմա Թուրքիայում, ըստ էության, տեղի է ունենում այդ պատգամավորների հետապնդում, այսինքն՝ գտնում են գյուղերը, ընտանիքներին: Թուրքիայում տարածված էին այդ պատգամավորների նկարները, անունները, գյուղերը, հարազատները: Այսինքն՝ որոշակի Լինչի դատաստանի կոչ էր արվում թուրքական մամուլում»:
Ռուբեն Մելքոնյանը նկատեց, որ կատարվածը Թուրքիայի համար նախկին վարչապետ Ահմեդ Դավութօղլուի հեռացումից հետո առաջին մարտահրավերն էր, որը Թուրքիայի նոր կառավարությունը եւ նոր վարչապետը չկարողացան հաղթահարել. «Տեսանք, որ նոր վարչապետը, փաստորեն, չկարողացավ միջազգային խաղի կանոնների համաձայն Թուրքիայի այս ուրացման քաղաքականությունը առաջ տանել»:
Ամի ՉԻՉԱԿՅԱՆ
