Ինչպես հայտնի է, Ազգային ժողովի փոխնախագահ, ՀՀԿ խոսնակ Էդուարդ Շարմազանովը անդրադարձել էր Լեռնային Ղարաբաղի Հանրապետության պատգամավոր Հայկ Խանումյանին ծեծի ենթարկելուն: «Շատ լավ կլիներ, որ Հայաստանի Հանրապետության բոլոր քաղաքական ուժերը հանգիստ նստեն իրենց տեղը և իրենց քիթը չխոթեն Արցախում ընթացող պոցեսներում»,- ասել էր նա:
«Անդրադարձ» մամուլի ակումբում հունիսի 8-ին լրագրողները ԱԺ Հանրապետական խմբակցության պատգամավոր Լեռնիկ Ալեքսանյանին (լուսանկարում՝ ձախից) խնդրեցին մեկնաբանել այդ հայտարարությունը: Նա հրաժարվեց որեւէ մեկնաբանություն կատարել, սակայն բացատրեց, թե ինչ է հասկացել այդ հայտարարությունից. «Դեռեւս չպարզաբանված հարաբերություններ են, մեր՝ կոնկրետ Հայաստանի իշխանությունների կողմից չմարսված, որ իրոք խառնվելը կարող է բացասական ազդեցություն ունենալ, քաղաքականացվի հարցը, որովհետեւ չգիտենք: Օրինակ՝ ես անձամբ մամուլից եմ լսել, մարդկանցից, որոնք ավելի մոտ են կանգնած, բոլոր դեպքերում չեմ կարողանում հասկանալ, թե ում էր դա պետք, ենթադրություններ կարելի է անել, դրա համար խառնվելը, ժամանակից շուտ գնահատականներ տալը նույն բանն է, որ մեծացնում ես ավելի»:
Լեռնիկ Ալեքսանյանը նշեց, որ երեւույթը տգեղ եւ դատապարտելի է, այդտեղ երկրորդ կարծիք չի կարող լինել, բայց, ըստ նրա, ուրիշ խնդիր է գնահատականներ տալը. «Մամուլում արդեն շրջանառվում են տարբեր տարբերակներ, որոնք ավելի շատ խառնում են: Մենք ուզում ենք երեւույթը հասկանալ, կարծում եմ երեւույթը պարզ կլինի. մարդը ճանաչում է իրեն ծեծողներին, ինքը գնահատական կտա, Սամվել Բաբայանը արտահայտվել է, կարծում եմ՝ էլի կարտահայտվի: Այսինքն՝ այս կոնտեքստում, որ նայում ես, իրոք, չարժե, որ այստեղի քաղաքական գործիչը, որը չգիտի բանն ինչումն է, գնահատականներ տա: Շարմազանովի ասածը սա է նշանակում»:
Կարդացեք նաև
Ամի ՉԻՉԱԿՅԱՆ
