Արդեն երրորդ անգամ Հայաստանում կանցկացվեն Չինաստանի մշակույթի օրեր: Բացման արարողությունը տեղի կունենա հունիսի 11-ին Ալ. Սպենդիարյանի անվան օպերայի և բալետի ազգային ակադեմիական թատրոնում: Համերգային ծրագրով հանդես կգա Չինաստանի հաշմանդամություն ունեցող անձանց երգի ու պարի համույթը: Հունիսի 12-ին նրանք ևս մեկ համերգ կունենան Երևանում, իսկ 13-ին՝ Գյումրու Վ. Աճեմյանի անվան պետական դրամատիկական թատրոնում:
«Այս համույթը հատուկ տեղ ունի Չինաստանում, բայց ոչ այն պատճառով, որ անդամները հաշմանդամություն ունեցող անձինք են, այլ որովհետև ցույց է տալիս շատ բարձր, պրոֆեսիոնալ մակարդակ: Այդ մասին շատ երկրներում կարող են վկայել»,- ՀՀ մշակույթի նախարարությունում այսօր լրագրողների հետ հանդիպման ժամանակ ասաց ՀՀ-ում Չինաստանի Ժողովրդական Հանրապետության արտակարգ և լիազոր դեսպան Թիան Էրլուն:
Հիշյալ համերգներից բացի, հունիսի 11-ին Հովհ. Թումանյանի թանգարանում կբացվի Չինաստանի մետաքսի ասեղնագործության մշակույթը ներկայացնող ցուցահանդես, որը կգործի մինչև հունիսի 17-ը:
Հայաստանում Չինաստանի և Չինաստանում Հայաստանի մշակույթի օրեր են անցկացվում երկրների մշակույթի նախարարությունների միջև ստորագրված երկկողմ համաձայնագրերի շրջանակում:
Կարդացեք նաև
ՀՀ մշակույթի նախարարությունում այսօր ստորագրվեց «ՀՀ և ՉԺՀ մշակույթի նախարարությունների միջև 2017-2020 թթ. մշակութային համագործակցության մասին» ծրագիրը: Փաստաթուղթն ստորագրեցին մշակույթի նախարար Հասմիկ Պողոսյանը և Հայաստանում ՉԺՀ արտակարգ և լիազոր դեսպան Թիան Էրլուն:
«Հայ-չինական մշակութային համագործակցության ծրագրի շրջանակներում 2008 թվականից ի վեր և´ Հայաստանում, և´ Չինաստանում մշակութային տասնյակ միջոցառումներ են իրականացվել՝ մրցույթներ, փառատոներ, գիտաժողովներ և այլն: Կարևորում եմ մասնավորապես այն ինստիտուցիոնալ համագործակցությունը, որը ձևավորվել է վերջին տարիներին»,- ասաց Հասմիկ Պողոսյանը:
«Համոզված ենք, որ մշակութային համագործակցությունը, փոխազդեցությունները երկկողմ հարաբերությունների կարևոր բաղադրիչ են, հատկապես մշակութային դարավոր ավանդույթներ ունեցող այնպիսի երկրների համար, ինչպիսիք են Չինաստանն ու Հայաստանը: Մշակութայինը մեր համագործակցության առաջնահերթություններից է: Աշխատում ենք, որ մեր ժողովուրդներն ավելի շատ բան իմանան միմյանց մասին, փոխազդեցության մեջ մտնեն մշակույթի ոլորտում»,- իր հերթին նշեց Թիան Էրլուն:
Սիրանուշ ՀԱՅՐԱՊԵՏՅԱՆ
