«Տղայիս պոչուկը 15 տարեկանում վիրահատել են, տակը թարախային պրոցես ա, չի կարողանում պառկի»,- այսօր ՊՆ-ին առընթեր հասարակական խորհրդի նիստում այսպիսի բողոք ներկայացրեց նորակոչիկներից մեկի՝ Արմեն Կեցոյանի հայրը՝ Հարություն Կեցոյանը:
Հիշեցնենք, որ 2016թ. ամառային զորակոչի ընթացքում քաղաքացիների դիմումներում եւ բողոքներում բարձրացված հարցերի արագ լուծման նպատակով ՀՀ պաշտպանության նախարարի հրամանով ստեղծվել է հանձնաժողով:
Արմեն Կեցոյանի ծնողները նաեւ բողոքեցին, որ իրենց որդին ալերգիա էլ ունի, բայց Կենտրոնական բժշկական հանձնաժողովը դա հաշվի չի առել:
Թե ինչի՞ց ունի՝ ալերգիա՝ տղան պատասխանեց՝ «դեղերից ու եղանակից»: Մայրն էլ կողքից հուշեց՝ «իրա քրտինքից էլ ունի անգամ»:
Կարդացեք նաև
Հայրը վստահեցնում էր՝ «Մի քիչ եղանակը սառավ՝ ձեռքերը կարմրում, ճաքում, ականջների մեջ խշշում ա»: Մայրն ավելացրեց, որ որդու ձեռքերը կապտում են, ցրտահարված են:
Հանձնաժողովի նախագահ Գեղամ Հարությունյանն էլ պատասխանեց, որ այդ ամենը ստուգելու ձեւ կա. «Արդեն ստուգել են ձեր որդու ձեռքերը, սառեցնում են, հետո թողնում են իրեն-իրեն հետ գա, ստանդարտներ կան, թե քանի րոպեում պետք է հետ գան: Ձեր որդու ձեռքերը 3-3.5 րոպեից հետ են եկել, դրա համար չեն կարող ծառայության համար ոչ պիտանի համարել տղային:
Մոր խոսքերով՝ 2013-ից իր տղայի մոտ նաեւ դեղորայքային ալերգիա են հայտնաբերել՝ անալգինի նկատմամբ: Հանձնաժողովի անդամներն էլ փաստաթղթերն ուսումնասիրեցին ու ասացին՝ անալգինից ալերգիա ունի, իբուպրոֆենից չունի, այնպես որ, դա հիմք չէ՝ զինծառայությունից ազատելու համար:
Հանձնաժողովի անդամները նաեւ տղայի պոչուկն ուսումնասիրեցին, ասացին՝ արտաքին զննությամբ չոր վերք է, մաքուր է, թարախային պրոցես չկա: Այնուամենայնիվ, հանձնաժողովը որոշեց, որ պոչուկի հետ կապված միջնորդությամբ հանդես գա եւ զինկոմը նորից հարցն ուսումնասիրի. «Պոչուկի խնդիրը երբ վերացվի՝ նա պիտանի է զինծառայության»:
Հայրը սկսեց նեղսրտել, թե զորամասում ո՞նց է լինելու տղայիս հարցը, բա որ ծանր մի բան տան, բա ալերգիան: Հանձնաժողովի անդամներն էլ բացատրեցին. «Ալերգիայից ձեր տղայի մոտ շոկային վիճակ չկա, անալգինից թեթեւ ռեակցիա է եղել, ինչի՞ եք ծանրացնում ձեր որդու վիճակը: Մի՛ կոմպլեքսավորեք ձեր տղային, մի՛ ներշնչեք, որ նա առողջական խնդիրներ ունի, նորմալ տղա է»:
Հռիփսիմե ՋԵԲԵՋՅԱՆ
