«Ուրեմն ինչ-որ բան արել է, որ ձերբակալել են, հրեշտակների ու սատանաների չբաժանվենք»,- ՀՀԿ պատգամավոր Լեռնիկ Ալեքսանյանն այսօր «Հայելի» ակումբում այսպես մեկնաբանեց Ժիրայր Սեֆիլյանի ձերբակալությունը:
Քաղաքագետ Գուրգեն Եղիազարյանի խոսքերով՝ «Մեր մեջ սատանաները չափազանց շատ են: Եթե Մարտի 1-ը, Հոկտեմբերի 27-ը տեսած չլինեի, կմտածեի, որ Ժիրոն ինչ-որ մի բան արել է, բայց 135 հոգու ձերբակալել Մարտի 1-ի գործով, 135 հոգուց ոչ մեկի վրա դատարանը քրգործով ոչ մի ապացույց չբերեց, ու մինչեւ այսօր այդ ստորներից ոչ մեկը պատժված չի՝ հանիրավի մարդկանց բանտերը նետելուց առաջ: Ժիրոյին էլ հենց էնպես են վերցրել: Ես չեմ կիսում Ժիրոյի քաղաքական հայացքները, գտնում եմ, որ պետք է ՌԴ-ի հետ մի թիմում լինենք, չեմ ընդունում նրա արեւմտամետ հայացքները, բայց չեմ ընդունում, որ օրը ցերեկով մարդուն այդպես տմարդի վերցնեն: Գետի՛նը մտեք, ի՞նչ է նշանակում , որ Ժիրոն պետք է երկու ինքնաձիգով այդքան գործողություն աներ, հեռուստաաշտարակը վերցներ: Հեռուստաաշտարակը Ժիրոն էդ երկու ինքնաձիգով վերցնում էր ի՞նչ աներ, կարար մենակ Հ1-ը անջատեր, միացներ, ի՞նչ պիտի աներ հեռուստաաշտարակը վերցնելով: Ժիրոյի՞ն են հիվանդի տեղ դրել, թե՞ իրանց: Հեռուստաաշտարակը վերցներ՝ ի՞նչ աներ, պետք է կողքի շենքը վերցներ ու ասեր՝ էս եք արել, էն եք արել»:
Գուրգեն Եղիազարյանը քննադատեց, որ ՊՆ-ն տեւական ժամանակ բանակի համար բարձր գներով ձու էր գնել: Նրա խոսքերով՝ «Հիշեք, ձու գողացողը ձի էլ կգողանա, իսկ իրենք այդ ձին վաղուց գողացել են»:
Հռիփսիմե ՋԵԲԵՋՅԱՆ
