ՀՀԿ-ական պատգամավոր Մկրտիչ Մինասյանն այն աստիճան լավատես է Կարեն Կարապետյանի` ՀՀ վարչապետի պաշտոնում նշանակման հարցում, որ համոզված է, թե նոր վարչապետը Հայաստանը դարձնելու է Սինգապուր:
«Հայելի» ակումբում շարունակելով Կարեն Կարապետյանի հասցեին գովասանքների հնչեցման թեման` պարոն Մինասյանն ասաց. «Շատ երիտասարդ տարիքից ճանաչում եմ նրան և անգամ այդ ժամանակվանից տարբերվում էր իր համակարգային մտածելակերպով: Տարիների ընթացքում, երբ նա աշխատեց «Հայէներգոյում», «Հայռուսգազարդում», համոզվեցինք, որ մարդը որպես մենեջեր ու գործի կազմակերպիչ լավագույններից մեկն է»:
Վկայակոչելով երեկ ՀՀ նախագահ Սերժ Սարգսյանի ելույթը Մկրտիչ Մինասյանը պնդեց, թե սպասելու ժամանակ չկա. երկրում կուտակված խնդիրներ կան և անկախ ամեն ինչից, թե որտեղ է հայ մարդը, եթե նա կարող է օգուտ բերել իր հայրենիքին, պիտի այդ հնարավորությունն օգտագործվի: Ամփոփելով միտքը` պարոն Մինասյանն ասաց. «Կարեն Կարապետյանի տեղափոխությունը «Գազպրոմից» Հայաստան արդարացված է: Հուսով եմ, որ Հայաստանը կդառնա Սինգապուրի նման մի բան, և նոր, համարձակ տնտեսական քայլերով ՀՀ տնտեսությունն ավելի ակտիվ տեմպերով առաջ կգնա»:
Միջազգային և անվտանգության հարցերի հայկական ինստիտուտի նախագահ Ստեփան Սաֆարյանն էլ հեգնեց. «Եթե գիտեիք Հայաստանը Սինգապուր դարձնող վարչապետի տեղը, ինչու՞ ավելի վաղ չէիք բերում»: Այնուհետև հակադարձեց, թե միայն մենեջերական որակներ չէ, որ պետք են Հայաստանի վարչապետին. «ՀՀ կառավարությանը պետք է ազատության մեխանիզմների աստիճան, որը պետք է տա ՀՀ նախագահը»:
Կարդացեք նաև
Դառնալով ՀՀԿ-ի` Կարեն Կարապետյանի նշանակմանն առիթով լավատեսությանը, պարոն Սաֆարյանն ասաց. «Ուրախ եմ, որ թիմը մեծ լավատեսություն է ստացել Կարեն Կարապետյանի նշանակումով, բայց ցավով հիշում եմ, թե ինչպես առանց բացատրության ճանապարհեցիք Կարեն Կարապետյանին Երևանի քաղաքապետի պաշտոնից, հատկապես, երբ նրա գործողությունները բավականին կտրուկ էին քաղաքում իրականացվող բարեփոխումների կտրվածքով: Զարմանում եմ` ինչո՞ւ այն ժամանակ չէիք պաշտպանում ռեֆորմատոր քաղաքապետին»:
Կարեն Կարապետյանի անձի հետ կապված այն մտահոգությունները, թե նա Հայաստան է գալիս, որպեսզի Հայաստանն ավելի վերահսկելի դառնա Ռուսաստանի համար, Մկրտիչ Մինասյանը շտապեց փարատել. «Նա ուղնուծուծով հայաստանցի է, հայ և Հայաստանի համար է աշխատելու: Այստեղ ռուսական հետք չեմ տեսնում»:
Տաթև ՀԱՐՈՒԹՅՈՒՆՅԱՆ
Մնում է սպասենք Սինգապուրի ԱԺ պատգամավորների ընտրությանը, հետո էլ հիանանք նրանց սինգապուրյան մակարդակի ելույթներով:
ՀԱՅԱՍՏԱՆԸ ԴԱՌՆԱԼՈԻ Է NEW VASJUKI—URRRA TOVAXIOSHI