Տավուշի մարզի Բերդ քաղաքի բնակիչ Վաչիկ Ծատուրյանին մեղադրանք է առաջադրվել այն բանի համար, որ նա 2016թ. մայիսի 20-ից 25-ն ընկած ժամանակահատվածում ուրիշի գույքի գաղտնի հափշտակություն կատարելու նպատակով ապօրինի մուտք է գործել Հովիկ Աթոյանին պատկանող հողամաս եւ այնտեղից հափշտակել 1 մետր 20 սմ բարձրությամբ արծաթափայլ եղեւնի, Հ.Աթոյանին պատճառելով 33 հազար դրամի նյութական վնաս: Մեր տեղեկություններով՝ նշված եղեւնին Վ. Ծատուրյանը տնկել է իրեն պատկանող հողամասում:
Վ. Ծատուրյանին մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 3-րդ կետով («Գողությունը՝ ուրիշի գույքի գաղտնի հափշտակությունը,որը կատարվել է պահեստարան կամ շինություն ապօրինի մուտք գործելով»):
Նրա նկատմամբ խափանման միջոց է ընտրվել չհեռանալու մասին ստորագրությունը: Այս քրեական գործով դատավարությունը վաղը՝ հոկտեմբերի 11-ին կմեկնարկի Տավուշի մարզի առաջին ատյանի դատարանի Բերդի նստավայրում:
Ոսկան ՍԱՐԳՍՅԱՆ
