«Տեղեկատվության համար էականորեն կարեւոր է ինտերակտիվությունը»,- հոկտեմբերի 29-ին «Դեբատ» մամուլի ակումբում լրագրողների հետ հանդիպման ընթացքում ասաց «Հայաստանի հեռուստատեսային եւ ռադիոհաղորդիչ ցանց» ՓԲԸ տնօրեն Գրիգոր Ամալյանը:
Նա նշեց, որ թվային հեռուստատեսությունը այն նոր տեխնիկական ձեւաչափն է, որը հնարավորություն է տալիս տեղեկատվության սպառողին տեղեկատվությունը ստանալ իր համար հնարավորինս հարմարավետ ձեւով. «Ամենաէժան, ամենաշարքային կցորդ սարքերը առնվազն ունեն timeshift-ի հնարավորությունը: Timeshift-ը նա է, երբ ուղիղ եթեր դիտելիս անհրաժեշտություն ունես հեռուստացույցից մի պահ հեռանալ, դու ուղիղ եթերը դադար ես տալիս ուղիղ եթերում, վերադառնում ես սկսում ես նույն մասից դիտել ուղիղ եթերը: Այսինքն՝ ստիպված չես այդ պահին ինչ-որ կարեւոր պատճառով կորցնել հաղորդման մի մասը»:
Գրիգոր Ամալյանը նշեց, որ սարքերը հեռուստաընկերությունների էլեկտրոնային ծրագրերի հնարավորություն էլ ունեն. «Ցանկացած պահի մարդ կարող է տեսնել ամբողջ շաբաթվա համար բոլոր հեռուստաալիքների ծրագրերը: Ավելին՝ ոչ միայն կարող է տեսնել, այլեւ կարող է ծրագրել, թե որ օրը որ ժամին իր հեռուստացույցը ավտոմատ անցում անի եւ որ ալիքին միանա: Մի խոսքով՝ ինտերակտիվ բաղադրիչը շատ կարեւոր էր եւ մեր ժամանակի պահանջն էր»:
Ամալյանը ընդգծեց նաեւ, որ մինչ այս հեռարձակվող ֆիլմերը մեկ ձայնային հոսքի հնարավորություն ունեին. «Հիմա հեռուստաընկերությունները հնարավորություն կունենան, եւ կարծում եմ՝ շուտով իրենց կողմից որպես լրացուցիչ ծառայություն կառաջարկեն ֆիլմեր տարբեր ձայնային տարբերակով: Ենթադրենք՝ թարգմանության տարբերակը, բնօրինակի»:
Կարդացեք նաև
Ամի ՉԻՉԱԿՅԱՆ
