Կատարողական արվեստների Համահայկական ասոցիացիայի նախաձեռնությամբ օրերս Երեւանում կայացել է Հայաստանի VI պարային օլիմպիադան, որի մրցավարական կազմի ներկայացուցիչները հրավիրված են եղել արտերկրից:
Օլիմպիադային մասնակիցների թվում էր «Նոր դար» համույթի մենապարող, Ժողովրդական պարերի աշխարհի առաջնության կրկնակի՝ գործող չեմպիոն Գարիկ Պետրոսյանը: «Նոր դար»-ի գեղարվեստական ղեկավար, պարուսույց Մհեր Պետրոսյանն «Առավոտին» պատմեց, որ համույթը հանդես է եկել մի շարք անվանակարգերում եւ հերթական հաջողությունները գրանցել: «Գարիկը եւ իր ընկերները ներկայանալով 26 պարով՝ նվաճեցին 2 արծաթե, 1 բրոնզե եւ 17 ոսկե մեդալներ, նաեւ 6 գավաթ՝ խմբակային պարերի մրցություններում: Մրցանակային տեղերի ընդհանուր հաշվարկով համույթն արժանացավ Գրան պրի մրցանակի՝ «Ժողովրդական պարերի» անվանակարգում»,-ասաց Մհեր Պետրոսյանը:
Ի դեպ, օլիմպիադայի գլխավոր մրցավար Անդրեյ Կակաոլինինը 11-ամյա Գարիկ Պետրոսյանին շնորհել է նաեւ գլխավոր մրցանակ՝ 2017թ. Մոսկվայում կայանալիք Ժողովրդական պարերի XIV աշխարհի առաջնությանն անվճար մասնակցելու հնարավորություն: Գարիկ Պետրոսյանը հասցրել է Մոսկվայում հայոց եռագույնը ծածանել առաջին պատվո հարթակում. այս տարի նա ճանաչվել է XIII Համաշխարհային պարային օլիմպիադայի հաղթող:
ԼՈՒԻԶԱ ՍՈՒՔԻԱՍՅԱՆ
«Առավոտ»
Կարդացեք նաև
04.11.2016
