«Այն ձևաչափը, որ ղարաբաղյան հիմնախնդրի կարգավորման համար համագործակցում են ԱՄՆ-ն ու ՌԴ-ն՝ երկուսն էլ ԵԱՀԿ Մինսկի խմբի անդամ են, չնայած նրանց միջև առկա լարված հարաբերություններին, միակն է ողջ աշխարհում: Համագործակցում են, որովհետև երկուսն էլ չեն ուզում, որ այստեղ պատերազմ լինի: Կշարունակեն աշխատել, որպեսզի պահպանեն բռնության մակարդակը որոշակի մակարդակի վրա», -այսօր «Տեսակետ» ակումբում ասաց քաղաքագետ Ալեքսանդր Իսկանդարյանը՝ պատասխանելով հարցին, թե հնարավո՞ր է ԱՄՆ նորընտիր նախագահ Թրամփը փոխի ԱՄՆ քաղաքականությունը ԼՂ հարցում:
Անդրադառնալով ԱՄՆ նախագահական ընտրությունների արդյունքներին, պարոն Իսկանդարյանն ասաց՝ անակնկալ ոչինչ չկար:
«Թրամփի օգտին քվեարկած ամերիկացիները քվեարկել են ոչ թե Քլինթոնի դեմ, էլիտայի դեմ: Ընտրական համակարգում ճգնաժամը գլոբալ է, այն արտացոլվել է Ֆրանսիայում, Ավստրիայում, Լեհաստանում, նաև Մեծ Բրիտանիայի հանրաքվեի ժամանակ, Հայաստանում նույնպես»:
Ըստ նրա, Հայաստանում էլ վերջին նախագահական ընտրություններում քաղաքացիների մեծամասնության նախընտրած թեկնածուն ոչ թե Րաֆֆի Հովհաննիսյանն էր, այլ՝ անտի Սերժ Սարգսյանը. «Վաշինգտոնի 93 տոկոսը քվեարկել է Քլինթոնի օգտին: Ի՞նչ է սա նշանակում, որ ԱՄՆ էլիտան և ժողովուրդը տարբեր կերպ են քվեարկել: Ժողովուրդն իր բողոքն է արտահայտել, քվեարկել են էլիտայի, համակարգի դեմ»:
Կարդացեք նաև
Քաղաքագետի համոզմամբ, Հայոց ցեղասպանության հարցում Թրամփի ընտրությամբ, որևէ բան չի փոխվի եւ ընդհանրապես Հարավային Կովկասում ոչինչ չի փոխվի:
Արփինե ՍԻՄՈՆՅԱՆ
