Զարգացման ֆրանսիական գործակալությունն այսօր 40 մլն եվրոյի վարկային համաձայնագիր է ստորագրել Հայաստանի Հանրապետության հետ, բազմասեկտորային բարեփոխումների ծրագրի իրականացումը ֆինանսավորելու նպատակով: Ստորագրման պաշտոնական արարողությունը տեղի ունեցավ ՀՀ Ֆինանսների նախարար Վարդան Արամյանի, Հայաստանում Ֆրանսիայի դեսպան Ժան-Ֆրանսուա Շարպանտիեի և ԶՖԳ-ի Ասիայի վարչության փոխտնօրեն Ժան-Կլոդ Պիրի ներկայությամբ:
Այս ֆինանսավորման նպատակն է ստեղծել հարկային և սոցիալական ավելի կայուն միջավայր, շրջակա միջավայրի ռեսուրսների ավելի կենսունակ կառավարում և մրցունակ և գրավիչ տնտեսական տարածք Հայաստանում: Այն մասնավորապես կաջակցի ներքին հարկային ռեսուրսների ավելի մեծ մոբիլիզացիային նվիրված բարեփոխումներին, ոռոգման ենթակառուցվածքների կառավարման բարելավմանը, սոցիալական ծածկույթի ընդլայնմանը՝ մասնավորապես անապահովների համար, գործարար միջավայրի բարելավմանը, առևտրական փոխանակումների դյուրացմանը և վարկերի մատչելիության զարգացմանը:
Այս ծրագիրն էլ ավելի կամրապնդի ԶՖԳ-ի դերը Հայաստանում, որտեղ գործունեություն է ծավալում դեռևս 2013 թվականից: «Մենք շատ ուրախ ենք Հայաստանի Հանրապետության հետ այս ֆինանսական համաձայնագրի ստորագրման համար: Այն նշանավորում է Ֆրանսիայի աճող հանձնառությունն ի նպաստ Հայաստանի տնտեսական և սոցիալական զարգացման: Այս ֆինանսավորումը կնպաստի տնտեսական աճի աշխուժացմանը և աշխատատեղերի ստեղծմանը», հայտարարեց Ժան-Ֆրանսուա Շարպանտիեն:
Սա ԶՖԳ-ի իրականացրած երրորդ ծրագիրն է Հայաստանում: Վարկի առաջին գիծը տրամադրվել է 2013 թվականին NMC Ազգային հիփոթեքային հիմնադրամին՝ անապահով ընտանիքների բնակարանների էներգետիկ արդյունավետության և վերանորոգման ներդրումների համար ֆինանսավորման առաջարկը զարգացնելու նպատակով : Երկրորդ վարկը ՀՀ-ին տրամադրվել է 2015թ. Վեդիի ջրամբարի և առնչվող ենթակառուցվածքների կառուցումը ֆինանսավորելու նպատակով : ԶՖԳ-ի կողմից Հայաստանին տրամադրված ընդհանուր գումարը կազմում է 127 մլն եվրո :
Կարդացեք նաև
Նշենք, որ՝ Զարգացման ֆրանսիական գործակալությունը (ԶՖԳ), ֆինանսական հանրային հաստատություն է, որն իրականացնում է ֆրանսիական կառավարության կողմից սահմանված զարգացման քաղաքականություն, գործում է հանուն աղքատության հաղթահարման և կայուն զարգացման: Աշխարհի 4 մայրցամաքներում, 75 գրասենյակների իր ցանցով, ԶՖԳ-ն ֆինանսավորում և աջակցում է այնպիսի ծրագրեր, որոնք բարելավում են բնակչության կենսապայմանները, աջակցում տնտեսական աճին և պաշտպանում մոլորակը: 2015 թվականին ԶՖԳ-ն 8,3 միլիարդ եվրո է տրամադրել զարգացող երկրների զարգացման ծրագրերի ֆինանսավորմանը և հօգուտ Անդրծովյան երկրների:
Հայաստանում Ֆրանսիայի դեսպանատուն
