ՀՀ պաշտպանության նախարարին կից հասարակական խորհրդի հովանու ներքո ստեղծված քաղաքացիների դիմումների և բողոքների քննարկման հանձնաժողովն այսօրվա նիստում քննարկեց 25 բողոք-դիմում:
Հանձնաժողովի նախագահ, պաշտպանության նախարարի խորհրդական Գեղամ Հարությունյանը պարզաբանեց, որ դիմում-բողոքները վերաբերում են զորակոչիկների առողջական հարցերին, դրանք բողոքներ են լրացուցիչ ստուգիչ հետազոտությունների, փորձաքննական գնահատականների հետ կապված:
«Հանձնաժողովի վերաբերմունքը տարբերակված է, կան բողոք-դիմումներ, որոնք հանձնաժողովի կողմից ընթացք չեն ստանում, եթե ընդունված որոշումները իրավաչափ են եւ հարկ չենք տեսնում միջամտել, մնացած դեպքերում, հանդես ենք գալիս միջնորդությամբ»,- ասաց Գեղամ Հարությունյանը:
Որքանով է արդյունավետ հանձնաժողովի աշխատանքը հարցին, նախարարի խորհրդականը պատասխանեց վիճակագրություն ներկայացնելով. «2009 թվականի աշնանային 14 զորակոչից հանձնաժողովը ստացել 2053 դիմում-բողոք, 1375-ին ընթացք ենք տվել՝ հանդես գալով միջնորդությամբ:
Կարդացեք նաև
Մեր միջնորդությունների հիման վրա վերանայվել է 370 զինծառայության պիտանելիության մասին որոշում, բավարարվել 78 այլ բնույթի դիմումներ:
Այսինքն, մեր միջնորդությունների հիման վրա 30 տոկոսից ավելին արմատապես բավարարվել է: Անցյալ զորակոչի ընթացքում ստացել ենք 261 բողոք, ներկայացրել ենք 157 միջնորդագիր, արդյունքում 48 զինծառայության պիտանելիության մասին որոշումներ վերանայվել են»:
Պարոն Հարությունյանի համոզմամբ, հանձնաժողովը նպաստում է զորակոչի գործընթացում կոռուպցիոն ռիսկերի նվազեցմանը. «Եթե ծնողները տեսնում են, որ իրենց առողջական խնդիրներ ունեցող երեխայի օրինական իրավունքները կարող են պաշտպանել օրինական ճանապարհով, ապա չեն դիմի զարտուղի ճանապարհների»:
Արփինե ՍԻՄՈՆՅԱՆ
