Ոչ պետական բուհերի ռեկտորների խորհրդի նախագահ, Հյուսիսային համալսարանի ռեկտոր Բորիս Մակիչյանը Aravot.am-ի հետ զրույցում կարծիք հայտնելով ԱԱԾ-ի մամուլի հաղորդագրության վերաբերյալ, որտեղ խոսվում է ոչ պետական բուհերում կեղծ հիմքերով ձեւակերպված պետական նմուշի դիպլոմների տրամադրման ու երեք ռեկտորների մեղադրանք առաջադրվելու մասին, ասաց, որ երեք բուհերի մասին անհասցե հաղորդագրությունը ստվեր է գցում բոլոր ոչ պետական բուհերի վրա:
«Օրինակ, մեկը կարող է կարդալ ու ասել, իյա,՜ կարո՞ղ է Հյուսիսային համալսարանն է էդ բուհերից մեկը, բայց ինձ ճանաչողները գիտեն, որ մեր բուհում նման բան լինել չի կարող»,-ասաց նա:
Պարոն Մակիչյանը հավելեց, որ տեղեկատվություն չունի, թե կոնկրետ որ բուհերի մասին է խոսքը, նաեւ բողոքեց հանրապետությունում տիրող բարքերից:
«Օրինակ, երեկ պետական համալսարանից երկու ուսանող կռվել էին, մեկը մեկին սպանել էր: Ստվեր չի՞ ընկնում էլի նույն ձեւով: Ավելի լավ է կաշառք վերցնեն, քան մարդ սպանեն…Ձեր վրա էլ է ստվեր ընկնում, ինձ վրա էլ, երկրի վրա էլ, հայ ժողովրդի վրա էլ է ընկնում, որ այսպիսի այլանդակ բարքեր կան»,-նեղսրտեց ռեկտորը:
Կարդացեք նաև
ԿԳ նախարարությունից եւս Aravot.am-ին ասացին, որ ԱԱԾ-ի հաղորդագրությանը դեռեւս ոչինչ ավելացնել չեն կարող:
Հավելենք, որ ըստ պաշտոնական աղբյուրի՝ ավարտական վկայականներ են տրվել օտարերկրացիներին, մինչդեռ օտարալեզու կրթական ծրագրերի թույլտվություն որեւէ ոչ պետական բուհ չունի:
Գոհար ՀԱԿՈԲՅԱՆ
