Այս օրերին ֆեյսբուքում, սոցցանցերում եղանակի եւ այս մառախուղի հետ կապված բազմաթիվ մեկնաբանություններ, երբեմն անհեթեթ քննադատություններ են հնչում, թե կառավարությունն ինչի՞ համար է գնել հակակարկտային կայանները, եթե այս մառախուղը չէր ցրելու եւ այլն:
Այսօր «Սպուտնիկ Արմենիա» ակումբում հրավիրած ասուլիսում Aravot.am-ը Հայպետհիդրոմետ ծառայության օդերեւութաբանության կենտրոնի պետ Գագիկ Սուրենյանից հետաքրքրվեց՝ քաղաքացիները ձեր ֆեյսբուքյան էջն էլ են հաճախ «ռմբակոծում» իրենց մեկնաբանություններով, ի՞նչ հարցադրումներ են հնչեցնում:
Նա պատասխանեց. «Մեղադրանքները բազմաթիվ են՝ սկսած նրանից, որ այս մառախուղը ես եմ սարքել՝ կառավարության հետ հանցավոր համաձայնության գալով եւ «ՀայՌուսգազարդից» կաշառք ստանալով, մինչեւ այն, որ մենք հնարավորություն ունենք հակակարկտային կայաններով մառախուղ ցրել, բայց դիտմամբ չենք ցրում, որպեսզի մենք շատ կոմունալ մուծենք եւ մարդիկ ցրտից տանջվեն: Այսպես` մեղադրանքների շարան է:
Եթե մարդուն թվում է, որ մենք այնքան ենք հզորացել, մարդ արարածն այնքան կա, որ ստեղծի մառախուղ, որը կընդգրկի ամբողջ Արարատյան գոգավորությունը՝ Նախիջեւանի դաշտով մինչեւ Իրան…դե հիմա հազար մարդ՝ հազար կարծիք:
Կարդացեք նաև
Մի բան կասեմ՝ լավ օրից չէ, որ մարդիկ նման եզրակացություն են անում: Պարզապես մարդիկ համապատասխան միջոցներ չունեն իրենց բնակարանները ջեռուցելու եւ հոգեբանական այդ պայմաններից ելնելով՝ որոշ չափով նաեւ չարանում են մեր նկատմամբ»:
Հռիփսիմե ՋԵԲԵՋՅԱՆ
