Մատենադարանի տնօրենի թափուր պաշտոնի համար ընտրությունները հետաձգվում են, չնայած անցել են սահմանված ժամկետները: Նախկին տնօրեն Հրաչյա Թամրազյանի մահից հետո, տնօրենի ժամանակավոր պաշտոնակատար է նշանակվել արևելագետ, պատմական գիտությունների թեկնածու, Մատենադարանի գիտական քարտուղար Վահան Տեր-Ղևոնդյանը:
Ըստ Aravot.am-ի տեղեկությունների, այս ձգձգումը միտումնավոր է. Տեր-Ղեւոնդյանը պետք է հասցնի փետրվարի 28-ին դոկտորական ատենախոսություն պաշտպանել ու լրացնել պակասող հոդվածները, որպեսզի կարողանա հավակնել այդ պատասխանատու պաշտոնին:
Մատենադարանի տնօրենի ժամանակավոր պաշտոնակատարը հրաժարվեց հեռախոսով պատասխանել Aravot.am-ի հարցերին: «Ես համոզված չեմ, որ դուք «Առավոտի» թղթակից եք»,-ասաց նա:
Aravot.am-ը մեկնաբանություն խնդրեց նաեւ Բարձրագույն որակավորման հանձնաժողովի նախագահ (ԲՈՀ) Լիլիթ Արզումանյանից, օրինակ` այն մասին, թե ինչո՞ւ ԲՈՀ-ի կանոնադրության համաձայն Վահան Տեր-Ղեւոնդյանի ատենախոսության սեղմագիրը չկա Պատմության ինստիտուտի կայքում եւ արդյոք իրականությանը համապատասխանո՞ւմ են այն լուրերը, որ Տեր-Ղեւոնդյանը չունի պահանջվող թվով գիտական հոդվածներ:
Կարդացեք նաև
Տիկին Արզումանյանն Aravot.am-ին տեղեկացրեց, որ ԲՈՀ-ը պատրաստվում է նամակով դիմել Պատմության ինստիտուտի 004 խորհուրդ՝ խնդրանքով, որ պաշտպանությունը հետաձգվի, մանավանդ 2 հոդված պակասում է:
Ըստ մեր տեղեկությունների, պարոն Տեր-Ղևոնդյանը պաշտպանությունից առաջ ներկայացրել է գրքեր, որոնք որեւէ գիտական երաշխավորության չեն արժանացել եւ նաեւ մի հոդված, որը դեռ պետք է տպագրվի Բեյրութում:
Aravot.am-ը կապվեց 004 խորհրդի քարտուղար Հ. Մուրադյանի հետ: Վերջինս ասաց, որ Վահան Տեր-Ղեւոնդյանի սեղմագրի բացակայությունը պատմության ինստիտուտի կայքում, թյուրիմացություն է, եւ շուտով կդրվի, նաեւ հավաստիացրեց, թե պաշտպանությունը անպայման կայանալու է, իսկ Տեր-Ղեւոնդյանը պակաս հոդվածներ չունի, տեղեկանքով ներկայացրել է, որ մի հոդվածի տպագրություն հետաձգվում է ոչ իր մեղքով:
Հավելենք, որ Պատմության ինստիտուտի տնօրեն, պատմության գծով աստիճաններ շնորհող 004 խորհրդի նախագահ Աշոտ Մելքոնյանը, որի հովանավորյալն է Վահան Տեր-Ղեւոնդյանը, մեր հեռախոսազանգերն անպատասխան թողեց:
Aravot.am-ը Մատենադարանի տնօրենի ընտրությունները ձգձգելու վերաբերյալ մեկնաբանություն էր խնդրել նաեւ ԿԳ նախարարությունից: Գերատեսչությունը համապատասխան մեկնաբանություն տվել է yerkir.am-ին, որտեղ ասվում է, թե «ծառացած խնդիրներին ավելի արդյունավետ ու համապարփակ լուծումներ տալու և Մատենադարանի հեռանկարային զարգացումը ապահովելու նպատակով ԿԳՆ-ն նախաձեռնել է Մատենադարանի իրավական կարգավիճակը փոխելու գործընթաց»:
Գոհար ՀԱԿՈԲՅԱՆ
