Երեւանի Մ. Հերացու անվան բժշկական համալսարանի «Ապագա բժիշկ» ամսագրի դեկտեմբերյան համարը յուրօրինակ է: Ամսագրի մի ամբողջ էջ այս նախընտրական փուլում հատկացված է ՀՀ երկրորդ նախագահ Ռոբերտ Քոչարյանին, որը, ըստ էության, որեւէ առնչություն չունի համալսարանի հետ:
Իսկ ամսագրի 12 լուսանկարներում բուհի ռեկտոր Արմեն Մուրադյանն է:
Aravot.am-ը Բժշկական համալսարանի մամուլի քարտուղար Տաթեւիկ Գրիգորյանից հետաքրքրվեց` ի՞նչ նկատառումներից ելնելով են Ռոբերտ Քոչարյանին մեկ էջ հատկացրել «Ապագա բժիշկ» ամսագրում, արդյոք դա ավելի չի՞ ընդգծի շրջանառվող այն տեսակետը, որ Արմեն Մուրադյանը Ռոբերտ Քոչարյանի կադրերից է:
Կարդացեք նաև
Ի պատասխան, Տաթեւիկ Գրիգորյանը գրավոր պատասխանեց. «Ապագա բժիշկ» ամսագիրը քաղաքական որևէ ուղղվածություն չունի և այն կախված չէ անձերից, այլ իրադարձություններից: Ամսագրում հրապարակված որևէ նյութ քարոզչական բնույթ չի կրել և չի կարող կրել, առհասարակ բուհը ապաքաղաքականացված կառույց է, ուսումնական հաստատություն է, և ունի գեթ մեկ նպատակ՝ կրթել ապագա գրագետ բժիշկներ: Ուրախ ենք, որ հետաքրքրված եք բժշկական համալսարանի անցուդարձը լուսաբանող պարբերականով և մեծ սիրով յուրաքանչյուր ամիս կուղարկենք Ձեզ ամսագրի հերթական համարը:
Իսկ ինչ վերաբերվում է Ձեր կողմից մատնանշված և դեկտեմբերյան համարում լույս տեսած նյութին, ապա նշենք, որ ամսագիրը ունի հետևյալ կառուցվածքային ոճը՝ ներկայի և անցյալի համադրում: Հավելենք, որ այս սկզբունքով են կառուցված ոչ միայն Ձեր կողմից նշված, այլ նույն համարում զետեղված մի շարք այլ նյութեր ևս»:
Գոհար ՀԱԿՈԲՅԱՆ
