ԱԺ ՀՀԿ-ական պատգամավոր Գագիկ Մինասյանն այսօր լրագրողներին համոզում էր՝ ճիշտ չէ համամասնական ընտրակարգը վարկանիշային կոչել:
«ՀՀ ընտրական համակարգն ընդգծված համամասնական է, որտեղ մեծամասնականի հետք նույնիսկ չկա»,- «Բլից ինֆո» ակումբում ասաց պատգամավորը:
Ինչ վերաբերում է ընտրակաշառք բաժանելու լուրերին, պարոն Մինասյանը նկատեց, որ այն չի կարող ուղղորդել ընտրողին, որովհետեւ ընտրական մեխանիզմները հնարավորություն չեն տալիս պարզել՝ ինչպես է քվեարկել քաղաքացին. «Յուրաքանչյուր ոք ազատ է իր կամքն արտահայտելու գործում, հակառակ պարագայում կարող է դիմել իրավապահ մարմիններին»:
Պարոն Մինասյանը նաեւ նկատեց, որ կաշառք տալն ու վերցնելը քրեորեն հետապնդելի արարքներ են եւ թե՛ տվողը, թե՛ վերցնողը չպետք է մոռանան ազատազրկման վտանգի մասին:
Նա նաեւ հավելեց, որ ՀՀԿ-ն ամեն հնարավորն արել է երկրում բաց և թափանցիկ ընտրություններ անցկացնելու համար:
Անդրադառնալով սահմանին ստեղծված լարված իրավիճակին՝ պատգամավորը կարծիք հայտնեց, որ իրավիճակի պատճառը միջազգային հանրության կոչերի անտեսումն է.
Կարդացեք նաև
«Հայկական 2 պետություններն ակնկալում են, որ Ադրբեջանի վրա միջազգային ճնշումներն ավելի հստակ դառնան, որ հնարավոր լինի շփման գծում խաղաղություն ապահովել։ Սա հնարավորություն կտա բանակցային գործընթացում առաջ շարժվել»:
Պարոն Մինասյանի խոսքով, հայկական կողմը ապրիլյան պատերազմից հետո ուժեղացրել է պաշտպանական հնարավորությունները սահմանագծում, բայց. «Պետք է ավելի խորացվի, որովհետև ապավինել բացառապես միջազգային հանրության կոշտ արձագանքին, բավական չէ։ Այդ հայտարարություններին Ադրբեջանն ականջալուր չի լինում։ Միայն մեր պաշտպանական հնարավորությունների հզորացումը կարող է զսպել ադրբեջանական կողմի սանձարձակ քայլերը»:
Արփինե ՍԻՄՈՆՅԱՆ
