3 օր առաջ ՀՀ վերաքննիչ քրեական դատարանն ավարտեց Գյումրու մանկավարժական ինստիտուտի նախկին ռեկտոր, նորընտիր պատգամավոր Վարդևան Գրիգորյանի եղբոր՝ Հարություն Գրիգորյանի սպանության գործով քննությունը։ Հիշեցնենք, որ Շիրակի մարզի ընդհանուր իրավասության դատարանի կողմից 3 տարի, 3 ամիս ազատազրկման էր դատապարտվել Հարություն Գրիգորյանի հարևանը՝ ռազմական ոստիկանության նախկին պաշտոնյա Արման Կատունյանը։
Վերաքննիչ քրեական դատարանը մասնակի բավարարել է Արման Կատունյանի փաստաբանների՝ Լուսինե Սահակյանի ու Երվանդ Վարոսյանի բողոքը՝ 3 ամսով կրճատելով նշանակված պատժաչափը (այն դարձավ 3 տարի) և դադարեցնելով նրա նկատմամբ ՀՀ քրեական օրենսգրքի 235-րդ հոդվածի 1-ին մասով (ապօրինի կերպով զինամթերք հանդիսացող փամփուշտ պահելը) իրականացվող քրեական հետապնդումը։
Փաստաբան Երվանդ Վարոսյանը Aravot.am-ին տեղեկացրեց, որ իրենք բողոք են ներկայացնելու նաև ՀՀ վճռաբեկ դատարան, քանի որ գտնում են՝ ՀՀ Քրեական օրենսգրքի 105-րդ հոդվածի 1-ին մասով 3 տարի ազատազրկումը խիստ պատիժ է։
«Այդ հոդվածի սանկցիան նախատեսում է մինչև 4 տարի ազատազրկում, իսկ Արման Կատունյանի պատիժն ու պատասխանատվությունը ծանրացնող հանգամանքներ գործում չկան, մինչդեռ առկա են բազմաթիվ մեղմացնող հանգամանքներ»,- ասաց Երվանդ Վարոսյանը։
Կարդացեք նաև
Հիշեցնենք, որ Արման Կատունյանը մեղադրվում է «կոմուլյատիվ աֆեկտի՝ հոգեկան խիստ հուզմունքի վիճակում» կատարած սպանության համար։
Նունե ԱՐԵՎՇԱՏՅԱՆ
