Այսօր ՀՀԿ խմբակցության ղեկավար Վահրամ Բաղդասարյանը, անդրադառնալով «Ծառուկյան» դաշինքում ստեղծված խնդիրներին՝ ինքնաբացարկի դիմումների հետ կապված, ասաց, որ եթե ԲՀԿ-ում իրենց խնդիրները չկարողանան լուծել, դրանով կզբաղվեն իրավապահները:
Նա ասաց, որ բնականաբար, երբ որեւէ հարց է առաջանում մեղավորներ են ուզում փնտրել եւ բնական է, որ թիրախում պետք է հայտնվի իշխանությունը՝ ՀՀԿ-ն. «Մենք չենք խառնվում որեւէ քաղաքական ուժի, որեւէ կուսակցության ներքին հարցերին: Համբերեք եւս մի քանի օր, իրենք իրենց հարցերը կպարզաբանեն, եթե իրենք ինքնուրույն չեն կարող պարզաբանել, դրանով կզբաղվեն իրավապահները»:
Լրագրողները խնդրեցին հստակեցնել՝ ի՞նչ նկատի ունի, երբ ասում է, որ դրանով կզբաղվեն իրավապահները՝ Վահրամ Բաղդասարյանը պատասխանեց. «Բնականաբար, եթե կլինեն խնդիրներ, որ տվյալ քաղաքական ուժի ներկայացուցիչները կդիմեն իրավապահ մարմիններին՝ պարզաբանումների համար, որովհետեւ այնտեղ կան վիճելի հարցեր, մի մասը պնդում է, որ իրենք չեն գրել, մյուս մասը պնդում է, որ դիմումներ կան…եթե նման վիճելի հարցեր են լինում, բնականաբար, դրանք ճշտում են իրավապահ մարմինները: Իսկ թե իրենք կդիմեն, թե չեն դիմի՝ հարցրեք իրենց: Դա իրենց ներքին հարցերն են»:
ՀԱԿ խմբակցության ղեկավար Լեւոն Զուրաբյանը ԱԺ վերջին ճեպազրույցում խոսելով Երեւանի ավագանու ընտրությունների մասին՝ ասել էր, որ դա Շռեկի, Չիպոլինոյի եւ Ձյունանուշիկի միջեւ պայքար է: Մենք հետաքրքրվեցինք՝ նմանություն տեսնո՞ւմ է, համաձա՞յն է այդ համեմատության հետ: Վահրամ Բաղդասարյանը պատասխանեց. «Այ, եթե հայտարարություն անողը՝ իրենց քաղաքական ուժը մասնակցություն ունենար այդտեղ, ես կմեկնաբանեի: Բայց եթե նրանք իրենց ռեսուրսները արդեն գնահատել են եւ չեն մասնակցում ընտրություններին, ես նպատակահարմար չեմ գտնում մեկնաբանելու նման քաղաքական ուժի ներկայացուցչի ասածները»:
Կարդացեք նաև
Հռիփսիմե ՋԵԲԵՋՅԱՆ