Այսօր Երեւանի ավագանու ընտրության քվեարկության ժամանակ Տարոն Մարգարյանի` Ավան վարչական շրջանի շտաբներից մեկում քաշքշել են «Երկիր Ծիրանի» կուսակցության քաղաքապետի թեկնածու Զարուհի Փոստանջյանին, իսկ նրա աղջկան տարել ոստիկանություն:
Փոստանջյանը պնդում է, որ հայտնաբերել է ընտրակաշառք ստացած անձանց ցուցակներ: Այս առթիվ ՀՀԿ փոխնախագահ Արմեն Աշոտյանը հայտարարեց. «ՀՀԿ-ն հյուրընկալ կուսակցություն է, բայց դա չի կարող չարաշահվել։ Մուտք գործել ՀՀԿ շտաբեր, ենթաշտաբեր առանց այդ տարածքում գտնվելու բարոյական, քաղաքական իրավունքի, քաղաքացիական չէ, եթե տիկին Զարուհին ուներ ահազանգեր, ապա իրավական պետության ներսում պիտի ահազանգեր ոստիկանություն:
Որևէ երկրում քաղաքական մրցակիցը չի կարող թույլ տալ ինքն իրեն այդ սկանդալը, որը տեղի ունեցավ՝ մտնի շտաբ, հագուստ պատռի և այլն»: Բժիշկները Զարուհի Փոստանջյանի դստեր մոտ ուղեղի ցնցում են ախտորոշել: Արմեն Աշոտյանը աղջկան շուտափույթ առողջություն է մաղթում եւ միաժամանակ նկատում. «Երեխաներին գուցե այդքան էլ ողջունելի չէ ներքաշել նման միջադեպերի մեջ, շուտափույթ առողջություն ենք մաղթում»:
Նելլի ԳՐԻԳՈՐՅԱՆ
