Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր շարունակվեց ոստիկանության ՊՊԾ գնդի գրավմանը հաջորդած օրերին Խորենացի փողոցում զանգվածային անկարգություններ իրականացնելու մեջ մեղադրվող Արարատ Խանդոյանի գործով դատավարությունը:
Այս նիստում նրա պաշտպան, փաստաբան Արա Ղարագյոզյանը հիմնավորեց, որ իր պաշտպանյալի գործողություններում հանցակազմը բացակայում է: «Զանգվածային անկարգություններ տեղի չեն ունեցել, ոստիկաններն են բռնություն կիրառել ցուցարարների հանդեպ: Երկու ոստիկանների՝ Խանդոյանի դեմ տված ցուցմունքներն էլ հակասում են իրար, նրանք անգամ հավաքի վայրում չեն եղել»,-Aravot.am-ի հետ զրույցում ներկայացնելով պաշտպանական ճառի բովանդակությունը՝ ասաց Արա Ղարագյոզյանը: Նա նշեց, որ ճառով միջնորդում է արդարացնել Արարատ Խանդոյանին: Վերջինս էլ համաձայն է պաշտպանի ներկայացրած հիմնավորումների եւ պահանջի հետ:
Ճառի լսումից հետո Արարատ Խանդոյանն էլ իր հերթին դատավորին հայտնեց, որ իր պաշտպանական ճառը դեռ պատրաստ չէ, ուստի ժամանակ է խնդրում: Ըստ այդմ, հաջորդ նիստը նշանակվեց հունիսի 27-ին, ժամը 11-ին:
Մանրամասն՝ տեսանյութում
Լուիզա ՍՈՒՔԻԱՍՅԱՆ
