Արմավիրի մարզի ընդհանուր իրավասության դատարանում դատավոր Արթուր Ադամյանի նախագահությամբ կայացավ ամուսնու՝ Արթուր Մելիքսեթյանի կողմից 2016 թվականի սեպտեմբերի 19-ին սպանված Նարինե Դանիելյանի գործով հերթական նիստը:
Նիստի սկզբում դատավորին փոխանցվեց տուժողի իրավահաջորդի ներկայացուցիչ Սեդա Սաֆարյանի միջնորդությունը՝ սպանության հանգամանքներն ավելի մանրամասն քննելու նպատակով դատարան հրավիրել ՀՀ ԱՆ հանրապետական դատական բժշկության գիտագործնական կենտրոնի Դ.Բ. փորձագետ Ա. Ա. Ավագյանին:
Դատավորն ընթերցեց միջնորդությունը, սակայն քանի որ Սեդա Սաֆարյանը առողջական խնդիրների պատճառով նիստին չէր ներկայացել, կողմերի համաձայնությամբ որոշեց հարցը հետաձգել հաջորդ նիստ, երբ Սեդա Սաֆարյանը կմասնակցի նիստին:
Միեւնույն ժամանակ դատավորը նշեց, որ ըստ ապացույցների հետազոտման կարգի բոլոր ապացույցները հետազոտվել են, ամբաստանյալ Արթուր Մելիքսեթյանի ցուցմունքները լսել են եւ մնացել է հրապարակել ամբաստանյալի անձը բնութագրող ապացույցները: Դրանք ընթերցելուց հետո դատավոր Արթուր Ադամյանը որպես Արթուր Մելիքսեթյանի պատիժը մեղմացնելու հանգամանք նշեց նրա խնամքի տակ գտնվող մինչեւ 14 տարեկան երկու երեխայի առկայությունը, ինչին տուժող կողմը համաձայն չէ:
Հաջորդ նիստը կկայանա հունիսի 31-ին:
Աշոտ ՀԱԿՈԲՅԱՆ
