Ըստ որոշ վիճակագրական տվյալների՝ յուրաքանչյուր զբոսաշրջիկ մեկ այցի ժամանակ Հայաստանում ծախսում է ամենաքիչը $750: Նրանց գրավում են հատկապես օրգանական սնունդը, տեսարժան վայրերը, մատչելի տրանսպորտը: Մյուս կողմից էլ՝ այնպես չէ, որ զբոսաշրջիկների առաջ կարմիր գորգ է փռված: Մինչ բարձրաստիճան պաշտոնյաները շեփորում են կառավարության զբոսաշրջության քաղաքականության ու ոլորտում իրականացված ծրագրերի մասին, տարրական հարցեր, սակայն, Հայաստանում լուծված չեն: Օրինակ՝ զբոսաշրջիկը չի կարող մետրոյի կայարաններից ձեռք բերել, ասենք, Երեւանի քարտեզը կամ տեղեկատու` դիցուք, Երեւանի տեսարժան վայրերի, սրճարանների, հյուրանոցների, ցուցասրահների, թանգարանների, քաղաքում իրականացվող մշակութային միջոցառումների վերաբերյալ: Այս լուսանկարն արվել է մետրոյի «Սասունցի Դավիթ» կայարանում: Ցուցանակի վրա զանազան հայտարարություններ են` քոլեջի, գնումներ կատարելու եւ այլնի մասին: Բայց կարող էր լինել նաեւ Երեւանի քարտեզը: Ընդ որում, «Սասունցի Դավիթ» կայարանը քաղաքի ամենաբանուկ հատվածներից է:
Լուսանկարը` ԳՈՀԱՐ ՀԱԿՈԲՅԱՆԻ
«Առավոտ»
14.07.2017
