Այսօր՝ հուլիսի 20-ին ՀՀ կառավարությունը հավանություն է տվել միասնական երթուղային ցանց ստեղծելու տեխնիկական առաջադրանքին: Տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը հայտնել է, որ այդ նախագծի ընդունումը պայմանավորված է հանրապետության ամբողջ տարածքում տրանսպորտային սպասարկում ապահովելու անհրաժեշտությամբ:
2014թ. հոկտեմբերից Նոյեմբերյան-Երեւան եւ հակառակ ուղղությամբ միկրոավտոբուսային երթուղին չի գործում: Նշված «գծում» միկրոավտոբուսային ուղերթներ էր կատարում «Բագրատաշենի մաքսային պահեստ» ՍՊԸ-ն:
Արդեն երկուսուկես տարի սահմանամերձ Նոյեմբերյան քաղաքից մայրաքաղաք եւ հակառակ ուղղությամբ ուղեւորների փոխադրումը կատարվում է միայն տաքսի ավտոմեքենաներով: Դա բազում անհարմարություններ է ստեղծում ուղեւորների համար. տաքսու ուղեվարձը միկրոավտոբուսի համեմատ թանկ է, հայտնի չեն լինում մեկնելու եւ ժամանման ժամերը, ճանապարհին տաքսիները կայանում են գազ լիցքավորելու համար, տաքսիստների մեջ լինում են երիտասարդ, անփորձ վարորդներ եւ այլն:
Ոսկան ՍԱՐԳՍՅԱՆ
