2016թ. Ոստիկանության ՊՊԾ գունդը գրաված «Սասնա ծռեր» զինված խմբի անդամներից 14-ի գործով դատական նիստն այսօր վերսկսվելուն պես դատավոր Արտուշ Գաբրիելյանն արձանագրեց, որ ամբաստանյալների պաշտպաններից Արա Զաքարյանը դահլիճում չէ:
Հիշեցնենք, նրա իսկ խնդրանքով նիստն ընդմիջվել էր, որպեսզի պայուսակը կամ համակարգիչը բերի: Դատավորն ասաց՝ իրեն հասած տեղեկություններով՝ փաստաբանը «դուրս է եկել դատարանի շենքից ու չի վերադարձել»:
Ամբաստանյալներից Սմբատ Բարսեղյանը տեղից խոսեց. «Երբ փուչիկը ծակ ա, չի փչվում, պետք է ծակը լցնես, որ փչվի…»:
Դատավորը Բարսեղյանին արգելեց տեղից խոսել, սակայն վերջինս շարունակում էր նաեւ նախազգուշացվելուց հետո: Դատավորը որոշեց նրան սանկցիայի ենթարկել՝ նիստերից հեռացնելով տասը ժամով:
Նույն սանկցիան այնուհետեւ կիրառվեց նաեւ ամբաստանյալ Պավիկ Մանուկյանի հանդեպ, որը տեղից բղավեց. «Ես ոչ մի բանից չեմ վախենում, ես էլ ձեր հանդեպ սանկցիա կկիրառեմ»:
Նիստն ընդմիջվեց 6-րդ անգամ:
Լուիզա ՍՈՒՔԻԱՍՅԱՆ
