Օրերս անցկացված ջրագնդակի Հայաստանի պատանիների առաջնությունում հանրապետության չեմպիոնի կոչումը նվաճեց Երեւանի ORWP-ն, մրցանակային հաջորդ տեղերը զբաղեցրին, համապատասխանաբար, «Արմադան» եւ «Ատլանտը: Առաջնության ավարտին «Առավոտը» զրուցեց Հայաստանի ջրագնդակի ֆեդերացիայի նախագահ Գագիկ Հովհաննիսյանի հետ:
– Միայն Երեւանի թիմե՞րն էին մասնակցում:
– Արդեն երկրորդ տարին է, որ Վանաձորը թիմ է ներկայացնում, եւ վատ հանդես չեն գալիս:
– Վերջին տարիներին Հայաստանում ջրագնդակի երկու հասարակական կազմակերպություն էր գործում՝ Հայաստանի ջրագնդակի ֆեդերացիան, որի նախագահը Դուք եք, եւ Ջրագնդակի հայկական դաշնությունը: Դեռ այդպե՞ս է:
– Ոչ: Վերջերս ՀՀ սպորտի եւ երիտասարդության հարցերի նախարարությունում կայացած այս երկու հասարակական կազմակերպությունների համատեղ ժողովում Դաշնությունը լուծարվեց ու միավորվեց մեր ֆեդերացիային, կազմակերպվեց նախագահի նոր ընտրություն, որում ղեկը կրկին ինձ վստահվեց:
– Այս առաջնությունը ինչպե՞ս կգնահատեք: Ձեր ակնկալիքներն արդարացա՞ն:
– Առաջընթաց միանշանակ կա, վերջին տարիներին երկու կազմակերպությունների առկայության պայմաններում ստեղծված խոչընդոտները, ինձ թվում է, վերացել են: Հիմա մարզաձեւի աշխարհագրությունը կրկին սկսել է ընդլայնվել: Նպատակ ունենք ջրագնդակը տարածել նաեւ այն մարզերում, քաղաքներում ու համայնքներում, որտեղ դրա հնարավորություններն առկա են:
– Բացի ներհանրապետական միջոցառումներից՝ միջազգային մրցաշարերի մասնակցո՞ւմ եք:
– Անցած տարի մեր ֆեդերացիան հովանավոր ուներ, ինչի շնորհիվ կարողացանք Մոսկվայում միջազգային մրցման մասնակցել եւ գրավել երրորդ տեղը: Այս տարի խնդիրը մի փոքր ավելի լուրջ է: Հույս ունենք ֆինանսական որոշ հարցեր կարգավորել սպորտի պետական կառույցի հետ համագործակցելով: Իսկ եթե մարդիկ կան, որոնք ուզում են օգտակար լինել ջրագնդակին, մեր ֆեդերացիայի դռները նրանց առջեւ բաց են:
– Պատանեկան առաջնությունն ավարտվեց: Ի՞նչ է լինելու հետո:
– Արդյունքներով կկազմավորվի 1999թ. եւ ավելի ուշ ծնված ջրագնդորդների հավաքականը: Մեր նպատակն է, որպեսզի այս հիմքի վրա ձեւավորվի ապագայի ազգային հավաքականը, որը հետագայում Հայաստանը կներկայացնի միջազգային ասպարեզներում: Դա շատ կարեւոր է: Բավականին հրավերներ ունենք, բայց կրկնում եմ՝ ֆինանսների սղության պատճառով չենք կարողանում մասնակցել:
– Միայն ֆինանսական խնդի՞րն է պատճառը, որ ազգային հավաքական դժվար է ձեւավորվում:
– Շատ թե քիչ մարտունակ ազգային հավաքական ձեւավորելուն խանգարում է նաեւ այն, որ մեր մարզիկները, որպես կանոն, զինծառայությունից հետո չեն վերադառնում:
– Հաշվարկ կա՞, թե Հայաստանում ջրագնդակով քանի մարդ է զբաղվում:
– Մոտավորապես 250-300 երեխա ունենք: Քանակն անցած տարվա համեմատ բավականին ավելացել է:
ԱՇՈՏ ՀԱԿՈԲՅԱՆ
«Առավոտ» օրաթերթ
01.08.2017
